City tan Oscar Bobb khel zel dawn

Manchester City rawlthar duhawm Oscar Bobb chuan Premier League club tana khel chhunzawm zel turin contract thar a ziak a, kum 2029 nipui thleng Etihad Stadium-ah a cham dawn - a contract neih lai hi June 2026-a tawp tur a ni.

Kum 20 mi Bobb chuan, "Kan chhehvel boruak a nuam a, player naupang tan chuan he hmun tluka awmna tur atana duhthusam a awm chuang lo. Pep leh a coaching staff, City tana ka khelhpuite hnen aṭang hian thil tam tak ka zir tawh a, kum 2029 thleng ka cham thei tur hi ka lawm takzet.

"Tunah chuan hma ka sawn zel theihna turin ka insawrbing ang a, he club-in hlawhtlinna a chan zel theih nan theihtawp ka chhuah chhunzawm ang," a ti a, City director of football Txiki Begiristain chuan, "Oscar hi pianpui theihna leh thiamna nei a ni a, kan squad-ah player pawimawh tak a ni der tawh a ni," a ti.

Norway tan match li a khelha goal khat khung tawh Bobb hian an ram club Lyn leh Valerenga-ah te a youth career chu hmangin, Porto-in lakluh tum mah se thil fel lo a awm avangin a zawm thei lo a, kum 2019 khan City academy a zawm a, September 2023 khan City tana a match hmasa ber a khel.

Bobb hian Pep-a enkawl team tan hian inelna hrang hrangah match 16 khel tawhin, goal hnih a khungsak a, January thlatira Newcastle United laka 3-2 a an chak ṭum khan hun pek belhah chakna goal a khung.