Hei le, innghahhlelh chu chawhma dar 10:00-ah Mizoram Vs Manipur

FIFA Santosh Trophy 2024 fixture a chhuah ruala Mizo tualchhung football chanchin sawi zui ber chu Mizoram leh Manipur inkhel tur a ni a, tunah chuan football tui lem lo thlengin vawiin chawhma dar 10:00-a inkhel tur hi an ngaihven tawh.

Manipur hi group B hmahruaitu an ni a, Mizoram hi pahnihnaah an awm thung. NorthEast Derby hi 'top of the table clash' a tih theih a, hei hian inkhel en châkawmna a belhchhah. Golden Jubilee Stadium-a inkhel tur hi khelmual chhunga a pawimawh vang chauh ni loin khelmual pawn boruak avangin ngaihven a hlawh hle.

Group B inkhel dangah Karnataka leh Railways te chawhnu dar 2:30-ah an inkhel dawn a, zanin dar 7:00-ah Maharashtra leh Delhi te an inkhel bawk ang. Group khatah hian team paruk an awm a, paliin quarterfinal an lut dawn.

Manipur an inpeih

Sangay Lhaden Sports Academy, Chimpu, Itanagar-ah nimin chawhma khan Manipur-in training hnuhnung an nei a, an zawh chiahah Mizoramin training an nei ve lehnghal. Training-na aṭanga a lan danin Manipur player-te an dam ṭha tlang niin a lang.

Tun hnaiah Manipur an insiamṭha a, hun rei tak Santosh Trophy an khelh mumal loh hnuin final round-ah pawh kum zawnin an tel tawh a, National Games hnuhnung ber pawh an khel pha a ni ringawt lo - final an lut hial.

Thangjam Saran Singh hote hian group stage-ah an khingpui an hneh vek a, final round-ah pawh hneh loh an la tawng lo. Itanagar-ah Manipur hian match hmasa berah Railways lakah point khat chauh a hlawh chhuak a, penalty an hlah bakah an goal chhuah hi injury time-ah a ni.

Manipur hian Mizoram hneh loh Maharashtra chu 2-1 in an hneh zui a, Ningombam Kabiraj Singh-a'n goal hnih a khung. Match hnuhnung berah Ngangbam Pacha Singh penalty hmangin Manipur hian Karnataka 1-0 in an hneh leh bawk. Mizoramin Maharashtra leh Karnataka lakah point khat chauh an hmu a, Manipur chuan heng team pahnih lakah hian point ruk an hmu thung.

Manipur hi tawnhriat nei ṭha Subhash Singh-a'n a la ho thei a, Subhash Singh hi East Bengal, Pune, Shillong Lajong leh Mumbai City tante a lo khel tawh a ni.

Mizoram ve thung

Mizoramin qualifying round-ah Services hneh loin bul an ṭan a, final round-ah Maharashtra hneh loin bul an ṭan. Qualifying round-a player ṭhenkhat inhliam leh club hmuh vangin squad siksawi a ni a, final round khel zingah squad siksawi nasa ber an ni hial ang.

Mizoram hian January 10, Nilaini aṭangin training an ṭan a, amaherawhchu February 8, Ningani aṭang chauhin Mizoram Police player-ten training an zawm theih avangin team kim ṭhap chuan kar khat ṭha bak traingin an nei lo.

Friendly match-ah Mizoramin goal khung an harsat a, tlarhnung a phui tawk lo bawk. Itanagar an pan khan Mizoram hi duhthusamin an inpeih hman lo a, training hnuhnung bera Lalnunzama inhliam chuan harsatna a belhchhah bawk.

Mizoram hian match hmasa berah Maharashtra an hmachhawn a, 3-1 ngawtin an tlawm. Match hnihnaah champion lai Karnataka lakah goal hnih khung hmasa mah se 2-2 in inkhel a tawp. Coach Lalsangzuala Hmar kaihhruai hian match tinah hma an la sawn zel a, match hnuhnung berah Delhi 5-1 in an sawp hial.

Mizoram hian match thum lek an la khel chungin inkhel tura inpeih player 21 an hmang kim vek tawh a, a eng zawnga thlir chuan player zawng zawng an hman tlak vek tihna a ni.

Mizoram an ṭangrual

Mizoram team hian zan tinin Pathian hnena inhlanna hun an nei ṭhin a, Itanagar-a awm Mizo Pastor-te pawhin he hun bik hi an hmanpui tawh bakah player-ten an hun harsa tawnte an sawi chhuak.

Itanagar an pan hnuah Aizawl aiin Mizoram team hi an inpumkhat lehzual a, tun dinhmunah chuan ṭhian chhan thih ngam Mizo tlangval rual tia sawi theih an ni. Mizoram hmun hrang hrang aṭanga kal khawmte hian an zia an inhre chho tawh a, team boruak pawh a zangkhai hle.

Mizoram manager K. Lalenghluna chuan, "Kan duh chu champion a ni a, Manipur hneh hi kan duh kan tih hlawhtlinna kawnga pawimawh a ni. Khelmual chhunga 100% pek kan tum," tiin Vanglaini a hrilh.

Mizoram team hi Itanagar-a Mizo awmten an thlawp ṭha em em a, match apiangin entu an nei ṭha ziah. Manipur nen an inkhel tur pual hian Mizoram Baptist Church enkawl Huto English School chuan 'Mizoram ṭang fan fan' tih banner lian ṭha tak an siam a, Mizoram striker Malsawmfela an thlawpna lantir nan no. 77 Sawmfela tih chuanna jersey an siamtir nual bawk.