Mizoram record a ṭha hret

Santosh Trophy-ah Mizoram leh Manipur te hi vawi khat ve ve champion tawh an ni a, Manipur hian final vawi hnih an lut tawh thung. Kum 2014 aṭanga thlir letin Manipur lakah Mizoramin record an nei ṭha hret.

Mizoramin kum 2014-a H. Vanlalthlanga hoa Santosh Trophy nomawi chawi tur khan Lammualah Manipur an hneh. Group match hnuhnung berah NorthEast football powerhouse pahnihte hi an inkhel a, Lammual khat tlat mipui an pungkhawm.

Goal difference-ah Manipur an ṭhat zawk avangin Mizoram tan chak ngei a ṭul a, pressure pawh a sang hle. Manipur lamin ṭan phat aṭangin hun an khawhral a, goal hmuh tur a awm lawk lo. Minute 82-naah R. Laldanmawia a rawn inlar a, Sialhawk Express hian goal pawimawh bik rawn khungin injury time-ah captain Zico Zoremsanga'n a khung belh.

Hetih hunlai hian qualifying round hi zone ang zela khelh a ni a; kum 2016-ah Mizoram leh Manipur chiah group khatah an awm. Mizoramin qualifying round hi an thleng a, ṭum hnih inkhelhtir niin Mizoram 1-0 in an chak.

Kum 2017 khan Shillong-a qualifying round khelh a nih ṭumin Mizoram hian 2-1 in Manipur hi an hneh a, hemi ṭuma team enkawltu chu tun ṭuma Mizoram enkawltu tho coach Lalsangzuala Hmar a ni.

Mizoram hian Manipur lakah record nei ṭha zawk mah se an intawn hnuhnun berah an hneh loh thung. December 2, 2021 khan Mizoram leh Manipur hi an inkhel leh a, Khuman Lampak Main Stadium-ah a ni thung.

Imphal-ah Mizoram tan final round lut turin draw a tawk a, mah se Manipur-in 1-0 in hnehna an chang. Mizoram kum 2018 hnuah final round an la khel leh lo a, tun ṭum hi final round-a Mizoram leh Manipur inkhelh hmasak ber tur a ni.