Coach thlak Aizawl FC tan result a la danglam lo

Mizo club Aizawl FC chuan nimin khan I League match-ah Real Kashmir an mikhual a, an beisei ang result an neih loh avanga coach Bobi Stojkoski bantu club hian coach thlak mah se result erawh an thlak tel thei rih lo!

RG Stadium-a inkhelah Henry Kisseka chuan minute 15-na lekah goal hmahruai a khung a, Mizo club-in hun tawp thlenga a chhanletna tur an neih loh avangin mahni mualah an tlawm.

AFC goal chhuah danah keeper Nora Fernandes chu dem theih a ni a, a tih tur a tih tawk loh avangin Muhammad Hammad-a 'throw in' aṭanga ball kal chu Henry Kisekka chuan a su lut!

North Macedonian coach Bobi ban a nih hnua an match hmasa berah Aizawl FC-in mipui beisei result pe thei lo mah se, assistant coach B. Malsawmzuala enkawlna hnuaiah hmasawnna hmuh tur a awm a, March 2 zana Manipur club Trau an mikhual hunah chuan result a danglam tawh a rinawm.

Aizawl FC hian an league match hnuhnung pasarihah chak an nei ta lo a, heng zinga match liah hian draw result neiin, match thumah an tlawm - Mizo club hian December-ah khan a zawna Trau leh Shillong Lajong hnehin, a hnuah a zawnin Gokulam Kerala leh Inter Kashi an inhnehtawkpui.

Sawmtea hnuaiah an result ṭha mah se, Mizo coach hian AFC A Licence a neih loh miau avangin Bobi lakluh a ni a, North Macedonian coach hnuaiah match li an khel hman - vawi hnih draw neiin, vawi hnih an tlawm a, an khel a mumal lo bawk.

Bobi ban a ni a, Sawmtea bawkin coach lailawk hna a chelh. Mizo tlangval hoa an khelh leh hmasak berah chak zo lo mah se, Mizo club khelh danah hmasawnna hmuh tur a awm a, hei hi a lawmawm lai chu a ni.

Real Kashmir tan hian Jeremy Laldinpuia chuan inkhel bul ṭanin, Lalramdinsanga Ralte chu bench aṭanga luhtir a ni.