Erling Haaland chu goal khung tura duan!

Manchester City striker Erling Haaland tan goal khung hi thil thar a ni lo a, match khata goal nga khung meuh pawh thil thar a ni ta lo. Norway international striker hian Luton Town lakah goal nga khungin 6-2 in an chak.

Nilaini zan FA Cup fifth round inkhelah Pep Guardiola naute hian goal an surtir a ni ber mai. Haaland bakah hian Mateo Kovacic chuan an goal rukna leh a hnuhnung ber ni bawk a khung a, midfielder Kevin de Bruyne-a'n Haaland khung tur pali ngawt a siamsak a ni.

Goal a sur

Pep Guardiola-a'n FA Cup a ngai pawimawh, kartawp Premier League inkhela a hahchawlhtir Kyle Walker leh Kevin de Bruyne ten bul an ṭan a, tun hnaia inlan tam lo Jack Grealish pawh a tir aṭangin a lut nghal bawk.

Minute thumna aṭangin goal kan hmu ṭan. Matheus Nunes ball fing umtu De Bruyne-a'n a cross zui a, a laia lo changtu Haaland-a'n a pet lut chiang hle. An goal hnihnaah pawh Haaland leh De Bruyne te inkawp thoin an khung.

Man City goalkeeper Stefan Ortega-a ball pet chhuah chu Luton defender Teden Mengi-a'n a lo chang chungin Haaland hian a lo tlawh thla a, ball tla hi KDB-a'n a um tura pet zui nghalin Haaland hian a va pet goal zui nghal pawp.

Half way line bul aṭangin De Bruyne-a'n player pathum karah through ball ṭha tak a pet chhuak a, ball um leh a chan thiam Haaland bawkin dawng fuh lehin keeper Tim Krul tan tihtheih a awm lo, an lama goal thumna lut lai hnai takah a en liam.

Luton an awm mai mai bik lo. Jordan Clark-a'n box pawn aṭangin goal mawi a khung a, a thlawh lut mawi hle - a siamsaktu chu Ross Barkley a ni. Barkley-a siamsak bawk hi Clark-a'n khung lehin chak lo chiang tawha ngaih khan beiseina an nei thar.

Mahse, defender Walker-a'n hla taka awm De Bruyne a hmu fuh a, a ball pek fing tak mai chu Belgian midfielder hian box chhungah um lutin Haaland tan bawk a siamsak a, an goal ngana Haaland khung erawh Bernardo Silva siamsak a ni thung.

In mamawh tawn

Manchester City manager Pep Guardiola chu a naute khelh danah a lungawi hle a, striker ṭha Erling Haaland leh midfielder thiam bik Kevin de Bruyne te chu an inmamawh tawn tih sawiin, an pahniha an khelh dun chuan an ṭha zual tih a sawi bawk.

Guardiola chuan, "A hmuh dan chuan Erling hian hmathlir thui tak nei player a mamawh, chutiang mi chu Kevin hi a ni thung. Kevin hi mahni hmasial lo tak mai a ni a, goal khung theihna remchang takah pawh midang siamsak duh zawk mi a ni.

"Kevin pawh hian Erling anga ball chang thiam leh che thiam hi a mamawh ve bawk, an pahnih hian an inmanin an hlauhawm zual em em a ni," a ti. Goalkeeper Ortega Moreno pawh Haaland a pek chauh ni loin a ball sem dang pawh a ṭha tih a sawi bawk.

FA Cup lama Man City che na lutuk hi Manchester United tan hriat nuam tak a ni kher lo ang. Tun kartawp Pathianni zan hian Premier League lamah 'Manchester Derby' a awm dawn, inbuatsaihna an nei ṭha hle.

Man City manager Pep chuan, "FA Cup leh Premier League chu a inelna a inang lo ang bawkin, a khelh dan phung pawh a danglam hle. Man United khelh dan phung a danglam daih bawk a, Luton nen chuan an goal ven dan pawh a inang lo.

"Inbuatsaih nan ni hnih chawlh kan nei dawn, he hunah hian rilru leh taksa ṭha takin kan inbuatsaih ang," a ti. Nizan khan Man United hian Nottingham Forest an hmachhawn thung a, kartawpa an tum tur City aiin hahchawlhna hun an nei tlem hret dawn a ni.

Inkhel dang

Thawhlehni zan inkhelah dangah Newcastle United an vannei hram. Magpies hi Blackburn Rovers nen 1-1 in an inhnehtawk a, extra time an khelh zawh hnuah pawh goal dang a luh zui loh avangin penalty hmanga chak zawk zawn niin 4-3 in an vannei ta zawk.

Ewood Park-ah goalkeeper Martin Dubravka a langsar, Dominic Hyam leh Sammie Szmodics te penalty pet a dansak. Harvey Barnes-a'n hlah ve bawk mah se Eddie Howe naute an dingchang ta tho a ni.

Magpies manager Howe chuan, "Team pahnih khan theihna zawng zawng sawmkhawm chungin kan khel a, a tu zawk pawh tlang ni ila a mak lo ang. FA Cup kan ngaihlu tlang a, chutiang taka ngaihhlut inkhela kan chak thei kha a lawmawm," a ti.

Inkhel dangah Leicester City pawhin extra time-a Abdul Fatawu goal khat hmangin Premier League club Bournemouth chu 1-0 in an hneh a, harsa angreng takin quarterfinal an inhlangkai ve bawk.

Foxes hi Championship club ni rih mah se Premier League leh FA Cup champion an nihna kha a la rei lo, an player ṭhenkhatin boruak sang an tawn ṭhan tawh avangin an chiai lo - goal khung tur siamsaktu Kelechi Iheanacho ngei pawh FA Cup leh Community Shield la tawhtu a ni.