Services an tling, Arunachal an tla

FIFA Santosh Trophy 2024-ah Services chuan nimin khan Assam 2-0 in an hneh a, Mizo tlangval Zothanpuia telna team hi quarterfinal lut turin an tling. Inkhel dangah Kerala-in Arunachal Pradesh 2-0 in an hneh a, inelna thlengtu Arunachal hi tla chiang hmasa ber an ni. Nizan khan Meghalaya leh Goa an inkhel result kan hre hman lo.

Services hian Goa an hneh loh hnuah an insiamṭha nghal a, Assam lakah Thingnam Bidhyasagar Singh hmangin minute 44-naah goal hmahruai an khung a, Christopher Kamei-a'n second half-ah indirect freekick aṭangin kawh zetin a khung belh leh bawk.

Inkhelh hnuhnung zawkah Arunachal Pradesh-in chak ngei an mamawh a, mipui ṭantu pawh an ngah. Mahse, team ṭha zawk Kerala-in Ashiq Shoukathali hmangin minute 35-naah an khung a, goalkeeper Jagom Loyi chetsual zarah Arjun-a'n minute 53-naah Kerala tan a khung belh a, 2-0 in inkhel a tawp.

Arunachal Pradesh hi inelna thlengtu an nih avanga final round lut an ni a, result ṭha duhin state pawn aṭangin coach Shyam Manik Lodh an lakluh bakah final round hmachhawn tur hian thla li chhung an inkulh hrang bawk. Amaherawhchu final round chinah chuan team ṭha vek an dam tawh a, inbuatsaihna nei ṭha Arunachal pawhin match li aṭangin point khat chauh an hmu an ni.