Club neituten Pochettino an thlawp

Chelsea manager Mauricio Pochettino chu club thuneitu lamin an thlawp tlat. Liverpool nen League Cup final an khelh zawh hnuah sawiselna tawng hnem zual deuh mah se tun maiah chuan an ban mai dawn rih lo niin a lang.

Club neitu Todd Boehly leh Behdad Eghbali ten an thlawp thu sawiin Poch-a chuan, "Inkhelh hma leh a hnuah pawh min thlawp - Todd hnen aṭangin thu hriat nuam tak mai ka dawng a ni.

"Behdad nen pawh kan inhmu a, inchibaiin thil thleng chi hrang hrang kan sawi dun. Reds nen kan inkhelte ka thlirlet a, minute 90 chhung ṭha takin kan khel thei, mahse a vanduai zawkah kan ṭang mai a ni," tiin a sawi.

Tun hnai khan England defender hlui Gary Neville chuan Chelsea chu sum tam tak hmanga din, manager pawhin a duh ang player leikhawm thei mah se team ṭha ni si lo angah a chhuah - London club lakah ṭawngkam a duhtui vak lo.

Pochettino chuan, "Jurgen Klopp-a'n Liverpool a enkawl tirh lam kha thlirlet ila, nomawi a chawi nghal pup pup lem lo - tun dinhmun thleng tur hian hun rei tak chhung team a din hmasa ve phawt tih hriat a ṭha ang.

"Thla riat chhung vel kan inkaihruai ve a ni chauh a, chutiang chunga final kan thleng nghal hi a ṭha viauah ka ngai. Player naupang tak takten final boruak sang minute 120 chhung an khel a, thil tam tak an zir chhuak a ni," a ti.

A hma hun zawhna chhangin Argentine manager chuan, "Ka kuta awm a ni lo. Club neitu leh Sporting Director kan nei, anni nen kan inkar boruak pawh a ṭha. Anni hi thuneitu an ni a, hei chu Coach thuneihna piah lam a ni zawk," a ti.

Chelsea hi Premier League-ah 11-na an ni mek a, a sang zual pali china awm aiin a tlahniam thei china awm an hnaih zawk. Nizan khan Leeds United nen FA Cup khelin, an result kan hre hman lo a, kartawpah Brentford nen league match an khel zui leh ang.