Indian Wells khel tur Djokovic a phur

Grand Slam dawta inelna ngaihhlut Masters 1000 zinga pakhat Indian Wells-ah Novak Djokovic a inlan thei dawn a, kum nga hnua a inlan leh vawi khatna tur a nih avangin a nghakhlel takzet tih a sawi.

BNP Paribas Open tia sawi bawk hi March thlatirah an khel dawn. Hripui danna a lak duh loh vangin Djokovic hian tun hnaiah US a lut thei lo a, hei bakah hian hliam a neih bawk avangin Indian Wells hi a khel lo rei hle.

World number 1 Djokovic chuan, "Indian Wells hi chu player tam takin Masters Tournament zinga an ngainat ber a ni a, chung mite zingah chuan kei ngei pawh ka tel. Inkhel entu an ṭha ṭhin a, infiammite chuan tennis vanram tiin kan sawi ṭhin hial.

"Kum nga chhung zet khel loa awm kha chu a hrehawm ka ti hle a, kuminah ka tan hun remchang ṭha a inherchhuak ve leh thei ta hi ka lawm," a ti. California chhim lam thlalerah hian a vawi ruk nan champion a tum dawn a ni.

Serbian star Djokovic hian kumina Grand Slam hmasa ber Australian Open nomawi a chawi thei a, tun season atan chuan Indian Wells hi a beisei theih lian leh hmasa a ni, thapui a thawh leh ngei ang.

Kum 36 mi Djokovic chuan, "A vawi khat nana Indian Wells title ka lak laite kha ka la hre reng, final-ah Mardy Fish nen kan inkhel tih pawh ka la chiang hle. He hmunah hian Roger Federer leh Rafael Nadal te bakah player ropui tak tak ka lo hmachhawn tawh.

"Ka tan chuan tournament hlu tak a ni," a ti. Indian Wells-ah hian vawi thum champion tawh Nadal pawh a inlan dawn. Spanish star hi hun rei tak hnua inkhel leh tur niin, tun hnai khan tournament khel tura a inpeih thu social media lamah a tarlang a ni.