Copa del Rey: Final khel tur Mallorca, naktukah Atletico

Spanish football-a club inelna ngaihhlut hlawh Copa del Rey pawh a hmawr an bawk hnai ta a, Real Mallorca chuan semifinal aṭanga Real Sociedad pet chhuakin final an lut.

Nimin zing lam dar 2:00 khan Spanish Cup semifinal second leg match hmasa zawk hi khelh a ni a, Real Sociedad khelmualah team pahnih hi 1-1 in an inhnehtawk - Mallorca tana Giovanni Gonzalez goal hmahruai chu Sociedad hian Mikel Oyarzabal hmangin an sut.

Minute 120 thlengin goal dang a lut lo zui a, team pahnih first leg-ah 0-0 in an lo inhnehtawk tawh a, away goal rule hman a nih loh bawk avangin penalty hmanga chinfel a ṭul - mikhual Mallorca an vannei ta zawk a, 5-4 in an chak.

Naktuk zing lam dar 2:00-ah semifinal second leg match hnihna hi khelh a ni dawn a, Athletic Bilbao khelmualah Atletico Madrid an lenglut dawn - first leg-ah 1-0 in Bilbao an lo chak tawh a, Atletico tan fimkhur a ngai.

A hunah tak

First leg-a team pahnih intawn hmasakah Mallorca-in an squad a chhah lo zawk tih an hrechiang a, goal venhim hna thawkin, an hlawhtling. Second leg-ah pawh 5-3-2 hmangin Mallorca hi an inrem a, an fimkhur hle.

Sociedad-in khung ngei tumin an nawr bawk a, mahse, goal khung hmasa zawk chu Mallorca an ni - minute 50-naah Gio Gonzalez chuan goal hmahruai a tauh lut a, hei hi inkhelh chhung zawnga target zawna chance an neih awmchhun a ni zui!

Mualneitu Sociedad-in chance nei mawlh mawlh mah se, a pawimawh ber goal an khung thei lawk lo. Minute 71-naah erawh an vanduai nawn tawh bik lo a, thiampuipa Oyarzabal chuan Sociedad si phurh sutna goal a khung.

Minute 90 chhung goal dang a lut lo zui a, minute 30 dang khelh a ni - hetah pawh goal lut a awm tawh chuang lo a, Mallorca an ṭang tlang. A tawpah penalty hmangin an chak zui a, final an lut.

Mangṭha Sociedad

Kum 2020 khan Sociedad-in final-ah Athletic Bilbao hnehin Copa del Rey nomawi an chawi a, tun season-ah pawh final lut ngat se nomawi chawi chance a sang leh dawn. Mahse, an beisei an tihlawhtling thei lo a, ui tak chungin Spanish Cup an mangṭha.

Mallorca goalkeeper Dominik Greif chuan Sociedad tana pet hmasa bertu Mikel Oyarzabal pet chu a dansak a, a hnu lama Sociedad tana pettu dang zawngin chhuihlut mah se, Mallorca tana pettuten an pet goal vek avangin rin loh zawk an chak.

Kum 2005 final-a rin loh taka Osasuna lo hruai thleng tawhtu, Mexican coach Javier Aguirre chuan Mallorca hi a kaihruai a, kum 21 hnua Copa del Rey final an khelh leh hmasak ber tur a ni - an final khelh hnuhnung berah hian champion nomawi an chawi.

Mallorca hian Spanish Cup final an luh vawi lina a ni bawk. Kum 2003-a an champion hma khan kum 1991 & 1998-ah final an lo khel tawh a, kum 2009 hnua semifinal an la khelh leh lohna inelnaah hian nomawi chawi ngei an tum dawn.

Atletico beiseina

Diego Simeone-a naute tan season a fuh hleithei lo a, inelna hrang hranga an match khelh hnuhnung parukah vawi khat chiah an chak - vawi hnih draw an nei a, vawi thum an tlawm. An tlawm zingah hian naktuk zinga an hmachhawn tur Bilbao laka first leg-a 1-0 a an lo tlawm tawh chu a tel.

Atletico-in tunah result hmasa thai bo a, final luh theihna remchang an nei dawn a, Simeone-a naute tan season duhawm lo tak hi hriatreng tlaka chantir theihna chance a awm dawn.

Hetihlai hian tlarhmaa player chhuanvawr Antoine Griezmann chu Inter Milan lakah khan a inhliam a, he thu buatsaih a nih lai hian a inlan theih dawn leh dawn loh a la chiang lo - tun season-a goal 19 khung tawh Álvaro Morata an la nei tho tih erawh hriat a ṭha.

Morata hi tlarhmaah Angel Correa nen inkawp tura ngaih an ni a, Simeone-a nauten si khat an phurh sa avangin goal khung tumin an nawr a rinawm - Bilbao hian Oihan Sancet, Nico & Inaki Williams, Copa del Rey match ruka goal ruk khungtu Asier Villalibre te ho an nei ve tho tih erawh theihnghilh loh a fuh ang.