Federer leh Djokovic inhmachawn thei dawn

Tennis season khat chhunga Grand Slam hmasa ber Australian Open chu Thawhṭanni zing aṭang hian Melbourne Park-ah khelh ṭan a ni dawn. Champion lai Novak Djokovic leh Roger Federer te chu semifinal-ah an inhmachhawn thei ang; anni pahnih hian final hma chuan Rafael Nadal an hmachhawn dawn lo tihna a ni.

Zirtawpni tlai khan Australian Open draw hi neih a ni a, round hmasa bera mipui ngaihven chu ni khat nia Venus Williams leh Coco Gauff te inkhel nghal tur a ni. Season hmasa Wimbledon-ah player pahnih hi an inhmachhawn tawh. Kum 15 mi Gauff hian Grand Slam vawi nga champion Venus hi a hneh - kumina an inkhel tur hi a hmuhnawm ang.

Player ropui ten khelh thiam bikna hmun an nei vek a, tun ṭuma an khelh tur Australian Open hi Novak Djokovic lalna ram a ni. Serbian tlangval hian a vawi riat nan champion a tum dawn - nomawi chawi tura a kalkawng erawh a awlsam dawn lo.

World number 2 hian Thawhṭanniah a match hmasa ber a khel dawn, a khingpui tura an pawh hi  world number 37 Jan-Lennard Struff a ni nghal. A chak chho zel a nih chuan quarterfinal-ah tunlai rawlthar ṭha bera chhal ngam, seeded parukna ni phak Stefanos Tsitsipas a hmachhawn ang.

An kalkawng en mai chuan Roger Federer tan semifinal luh beiseina a sang, chutih rualin a thiam pali zinga a tel a nih chuan Djokovic nen an intawng thei dawn - player ropui hi an intawng a nih chuan a hmuhnawm dawn. Federer hian match hmasa berah Steve Johnson a bitum dawn a ni.

Rafael Nadal-a'n a bul ṭan nan Hugo Dellien a hmachhawn dawn a, world number 1 hi a kaltluang a nih chuan fourth round-ah Nick Kyrgios nen inhmachhawn thei dinhmunah an ding; player pahnih hian tun hmain chanchin an lo ngah tawh hle.

Kyrgios hi theihna nei sang tak a ni a, mahse a nungchang vangin mi ṭan a hlawh loh bakah a thleng sang tawk lo. Nadal nen an inkhel fo tawh a, a khingpui hi a 'muang' tiin a sawisel tawh ṭhin. Holam takin ball pawh vawr kang loin Nadal hi a lo service khum vel tawh a ni.

Kuminah Kyrgios hian an rama kangmei tuarte puihna kawngah ṭhahnem a ngai a, tualchhung tlangval a nih bawk avangin season dang aiin ṭan a hlawh zawk a rinawm. Nadal kalkawngah hian US Open finalist Daniil Medvedev a awm bawk; Grand Slam nomawi la tur chuan kalkawng awlsam a awm thei lo.

Hmeichhe tennis player zingah tu nge ropui ber? tih zawhna inzawt ta ila, kan chhanna a inang lo ang - mi tam zawk chhanna erawh Serena Williams a neih ngei a rinawm. Grand Slam vawi 23 champion tawh hian record nei ṭha ber Margaret Court-i record (24 titles) nih rual a tum.

Wimbledon leh US Open final a chak lo Serena hi tun ṭumah hian rinkai a ni a, chutih rualin major tournament final a khelh hnuhnung pahnihah a hlawhtlin loh avangin rin thiam a harsa. Serena chuan, "Nomawi lian pakhat chawi belh leh phawt a tawk," tiin record khum ai chuan nihrual chu a rilruah a dah.

Tualchhung nula Ashleigh Barty pawh kum 42 hnua Australian nula an rama champion leh thei hmasa ber nih a tum dawn. Naomi Osaka, Simona Halep leh Karolina Pliskova te pawh champion tura rinkai zinga mi an ni ang.