Everton point paihsak zat an tihniam

Premier League club Everton chu Premier League financial rules an bawhchhiat avanga point 10 paihsak an nih hnuah tihhniamsak an ni a, an point paihsak zat hi point rukah tihhniam niin, Merseyside club ṭantute tan lawmna tur a awm.

Everton hi November khan Premier League hnuaia club-te sum hman dan khuahkhirhna, profit and sustainability rules (PSR) chu 2021-22 season khan an bawhchhia tiin, thiam loh chantir an ni a, hei vang hian point 10 paihsak an ni.

Hetihlai hian Premier League table-ah 14-na an nih lai niin, 19-naah an tla zui. Mahse, Premier League chanchina inhremna na ber hi Everton chuan ngaihtuah nawn turin an thlen let a, ngaihtuah nawn a nih hnuah tihhniam niin, 17-na aṭangin 15-naah an chho ve leh ta thung.

Premier League chuan thuchhuah siamin, Everton chuan thubuai ni loin, thubuai siamsak an nih avanga hremna an hmuh ṭhenkhat chu an khinlet thu leh, mi pathum awmna appeal-board chuan hei hi ngaituahin, "Thil pahniha an hremnaah tihsual awmah an ngai a ni," an ti a, an point paihsak zat tihtlem a nih dan an tarlang.

Mahse, Everton hi thlamuang taka awm thei erawh an la ni rih chuang lo. January khan 2022-23 a an sum hman dan avangin Nottingham Forest nen thubuai siamsak an ni a, April 8-ah Everton thubuai hi ngaihtuah tur a ni dawn.

Hetihrual hian Premier League club hian an thubuai hi an khinglet thei a, an khinglet a nih chuan May 24-ah ngaihtuah a ni chauh ang. Hetih hunah chuan season a zo tawh dawn a, Liverpool khaw club hian hei hi hre ran chungin, ngaihtuah nawn tura an thlen a rinawm.