Grealish tan hmasawn a ngai - Pep

Manchester City boss Pep Guardiola chuan tun hnaia khelhna hmun chang tam lo, English midfielder Jack Grealish chu a khelh danah hmasawnna hmuh tur a awm chuan, a starting XI-ah 'regular' taka a kir leh tur thu a sawi.

Kum 28 mi Grealish hian August 2021 khan pound maktaduai 100-in City hi a zawm a, hmun pawimawh a chang nghal. Season hmasa treble champion an nihna kawngah pawh player pawimawh a ni a, inelna hrang hrangah match 50 khelin, heng zinga 41-ah hian bul a ṭan.

FA Cup leh Champions League final-a bul ṭan zingah pawh a tel a, tun season-ah erawh inelna hrang hranga match 27 a khelh tawh aṭangin match 20-ah chiah bul a ṭan phak a, goal thum leh assist vawi hnih chiah a nei - Thawhlehni zana FA Cup-a 6-2 a Luton Town an sawpna inkhelah bul a ṭan thung.

Pep chuan, "A hmaa a manager tho kha min la nei a, kan khelh dan kan la thlak lo a, ani pawh season hmasa ami tho kha a la ni. A khelh dan ber hi a ni a, hei hi season hmasa nen khan a inang lo," a ti.

Spanish manager chuan sawi zawmin, "Season ṭantirh aṭang khan kan mamawh thu ka sawi a, kan team tana player quality tak a ni. Mahse, a kutah engkim a awm a, thla thum kan la neihah hian amah tak tak kan hmuh ka beisei. Insiamrem turin player-te hi match thum emaw match li emaw ka pe thei lo.

"Minute 20 emaw 90 emaw pawh ni se, khel thei tura an inpeih vat a ngai. Level sangah chuan player pakhat fit turin kan nghak reng thei lo. Mi pakhat nghah nan match thum emaw match li emaw chu a tam lutuk a, midang pawhin chutiang chu an duh ve tho.

"Kan training leh thil hotê nia kan ngaih aṭangin thutlukna siam a ngaih chang a awm. Player-te hian kei min hmin a ngai lo a, anmahni zawk hian team tana khelh an phu tih anmahni leh anmahniah an inchian a ngai a ni," a ti a, Grealish a duh khawp lo.