Olsson-a dinhmun a ṭha lo

Sweden midfielder Kristoffer Olsson chu an chenna inah nikhaw hre loa a awm hnuin damdawi inah hruai a ni a, ventilator a hmang mek. A club khelhna Midtjylland chuan thuchhuah siamin, "Thluak lam harsatna vangin enkawl a ni," an ti.

Danish club chuan Olsson hi Aarhus University Hospital-ah enkawl a nih thu an sawi a, February 20 daih tawh khan enkawl a ni. Midtjylland hian a tirah a dinhmun hi zep mah se, "A chanchin chungchangah sawi neuh neuh a awm avangin hetia puanzar mai hi a fuhin kan hria a ni," an ti a, Danish mithiamten a dam leh thuai theih nan uluk taka an enkawl thu an sawi bawk.

Sweden tana vawi 47 inlan tawh Olsson hi Arsenal aṭanga inzir chhuak a ni a, mahse, Gunners tan hian match khat chiah a khel hman. Danish Superliga, Swedish league, Russian Premier League leh Belgian Pro League lamah te a career a hmang.

Arsenal chuan, "Kristoffer dam thuai turin kan duhsak che a ni," an ti a, Swedish Football Association chuan, "Koffe huai takin bei zel rawh. Swedish football chhungkua chuan kan hre reng che a, i dam thuai kan duhsak che. He hun harsaah hian Kristoffer-a chhungte pawh kan hre reng a ni," an ti ve bawk.