Laureus World Sportsman of the Year Award - Messi, Haaland, Verstappen leh Djokovic

Infiamna peng pakhat chauh ni lo, infiamna hrang hrang huapa chawimawina siam ṭhin Laureus World Sports Awards sem a ni leh dawn - Sportsman of the Year Award dawng tura hming chhawp chhuahte an hraw hlawm hle.

Laureus World Sportsman of the Year Award dawng thei tur zingah hian Lionel Messi, Erling Haaland, Novak Djokovic, Mondo Duplantis leh Max Verstappen te hming a lang. Award hi April 22-ah sem tur a ni ang.

Argentina captain Messi hian an ram chu Qatar World Cup champion a nihpui hnuah Major League Soccer (MLS) lam a pan, a team thar chu Leagues Cup lakpui nghalin nikum khan a vawi riat nan mimal chawimawina sang Ballon d’Or an hlan.

Manchester City striker Haaland hian season hmasa khan Premier League, Champions League leh FA Cup te a la vek a, footballer chawimawina sang Ballon d’Or huangah erawh Messi a tluk ta lo - Laureus World Sports Awards lamah an hming a lang dun leh ta chiah a ni.

Tennis world number 1 Novak Djokovic hi a buk a rit dawn. Serbian star hian tun hmain he chawimawina hi vawi li a lo dawng tawh - season hmasa khan Australian Open, French Open leh US Open nomawi a la vek, major title 24 nei tawhin sulhnu a nei ṭha takzet a ni.

Chawimawina dawng thei zingah Formual 1 champion Verstappen pawh hi rinkai a ni. Red Bull driver hian season hmasa khan car intlansiakna sang berah a zawnin vawi 10 hnehna a chang thei a, vawi 19 tehmeuh chak tlingin record thar a siam.

Dutch tlangval hi F1 driver zingah a zawna vawi thum champion thei pangana a ni chiah a, kum 2022 khan Laureus World Sportsman of Year Award hi a lo dawng tawh, kuminah a vawi hnih nan a dawng a nih pawhin a mak lo ang.

Award dawng thei tur hi Laureus Global Media Panel ten an chawpchhuah an ni, anni hi khawvel hmun hrang hranga mite niin member 1300 lai an tling.