Wolfsburg-in Real & Ronaldo an hre lo!

El Clasico - a hnehna chang hlim Real Madrid-in inrin-tawkna sang tak nen Champions League quarterfinal first leg khel turin Germany pan mah se Wolfsburg -in Barcelona hnehtu team an hre lo - 2-0 in an lo hneh!

Karleh Thawhleh zana Bernabeu-a an inkhelh hunah Zinedine Zidane naute hna a hautak tawh dawn.

Cristiano Ronaldo-a'n Cham-pions League match 124-na a khelh zanah minute hnihna lekah, Karim Benzema hnen aṭanga a ball hmuh chu khung mah se offside vangin pawm a ni lo.

Volkswagen Arena-ah a ṭum khat nan Wolfsburg-in Champions League quarterfinal an khel a, Real Madrid defensive midfielder Casemiro-a'n minute 18-naah Chelsea player hlui Andre Schurrle a tihtluk avanga penalty a chawi chu Ricardo Rodriguez-a'n goal-ah a chan tir.

Real tlarhnung an insiam rem nghal thei lo a, forward Bruno Henrique ball siamsak ṭha tak mai chu Max Arnold-a'n minute 25-naah chiang zetin a khung leh a, Dieter Hecking-a nauten goal dang khung belh tawh lo mah se an lamah an chhuah loh avangin lawm takin khelmual an chhuahsan.

Real an ral?

Inkhel ṭan hmain Zidane chuan Wolfsburg nen an inkhelh tur chu 'Final' anga an khelh tur thu a lo sawi lawk tawh a, mahse inkhelh ban hnuah erawh a naute khelh dana a lawm loh thu sawiin semifinal lut tura beisei an la neih zui thu a sawi thung.

Barcelona hnehtu aṭangin Zidane chuan player pakhat chiah a siksawi a, Catalan club laka khel ṭha tak Casemiro chu Wolfsburg lakah erawh chak loh bul ṭantu anga ngaih theih a ni. Tlarhnung luahlumtu Sergio Ramos leh Marcelo ten an hna an tlin loin goal hnihna an chhuah dawn hian Arnold chu goal aṭanga yard ruk leka hlaah free takin an awm tir tlat.

Real Madrid hian La Liga-ah Barcelona chu point sarihin an phak lo mek a, title beiseina an nei sang tawh lo. Champions League-ah kum 2014 April thlaa Borussia Dortmund 2-0 a an hneh loh hnua a vawi khat nan si hnih an phur leh. Second leg-ah hneh let tur chuan goal thum tal an thun tlin a ngai tawh dawn a ni.

Real Madrid boos Zidane chuan, "Kan khelh danah ka lawm lo a, a bik takin a tir minute 45 chhung kha kan khel chhe hle. Football-ah chuan
ṭumdang anga khelh ṭhat theih miah loh hun hi a awm ve bawk. Tunah chuan hahchawlh kan mamawh. Thil thlak danglam vek turin kan khelmualah minute 90 dang hun kan la nei ve dawn," tiin hnehna chan let theih a la inbeisei hle.

Wolfsburg an lawm

'A bul ṭan ṭhat hi a chanve zo' tih hi Wolfsburg hian an hmang dik thei a nih chuan an club chanchina a vawi khat nan Champions League semifinal khel turin an dinhmun a ṭha tawh.

German Bundesliga-a pa-riatna dinhmun luahtu Wolfsburg hian Real Madrid lakah goal hnih an khung a ni mai lo a, second half-ah Schurrle chuan an goal thumna a khung teuh bakah substitute Max Kruse goal khung tur chu keeper Keylor Navas-a'n a dang hram bawk.

Wolfsburg boss Dieter Hecking chuan, "Real Madrid kan hneh thei tih thu ka sawi lai kha chuan mi khan min nuihzat a, tunah erawh a theih a ni tih an hre tawh ang. Team ṭha kan hmachhawn anih chuan kan
ṭanrual a ngai a, kan khelhṭhain hmunawl pawh kan insiamsak nual r>ng a ni. Madrid-ah pawh beiseina sang tak nen kan zin dawn," tiin a sawi.