Lewandowski a hmanhmawh lo

Bundesliga top scorer Robert Lewandowski chuan contract thar ziak tura a hmanhmawh loh tur thu leh a rilru luahtu ber chu nomawi chawi a nih zawk thu a sawi.

Poland international hian kum 2019 thleng cham turin Bayern Munich-ah contract a nei mek a, khawvela striker hriam ber pawl a nih avangin amah beiseitu tam tak an awm a, chung zinga langsar ber chu Real Madrid an ni nghe nghe.

An mit itzawng a piang hlah lotu Real Madrid nen sawi zawm an nih avang hian Lewandowski hi Allianz Arena-ah a awm reng ang em tih chu ngaihtuah tham a tling.

Kum 27-a upa Lewandowski chuan, "Ka inkhelh zel dan tur hi chiang taka ruahman lawk ka nei lem lo a, tun dinhmunah erawh Bayern Munich-ah hian ka hlim. Tun dinhmunah chuan he club tan hian theihtawp chhuaha nomawi a tam thei ang ber chawi pui hi ka thil tum leh ngaihtuah ber chu a ni," tiin a sawi.

Lewandowski hian tun season-ah Bayern tan inelna hrang hrangah match 41 a khelh aṭangin goal 36 a khung tling der tawh a ni.