I league hmahruaina hun ṭha bawhpelhtu Bengaluru

Champion lai Mohun Bagan leh East Bengal ten an khingpui Shillong Lajong leh Mumbai FC lakah point khat bak an hlawh chhuak thei lo a, Bengaluru FC-in hmahruaina hun ṭha nei mah se Ashley Westwood leh a hoten DSK Shivajians an draw hram.

Pune-a Balewadi Sports Complex-ah Eugeneson Lyngdoh hmagin Blues-in minute 33-naah hma an hruai a, Aser Pierric Dipanda Dica hmangin mualneitu DSK-in minute li hnuah an sut.

DSK-in goal khung theihna hun ṭha an nei ngah zawk a, Bengaluru FC-in point khat an hmu hi an vanneiah a ngaih theih.

English coach Westwood-a'n Mumbai FC laka chakna goal khungtu Daniel Lalhlimpuia chu inkhel bul ṭantir mah se Serchhip tlangval hian DSK tlarhnung a tibuai zo lo a, second half-a lut Lalchhuanmawia Fanai pawhin inkhel result a tidanglam pha lo.

DSK tan Real Madrid youth system chhuak Juan Quero chu mual sir lamah player hlauhawm ber a ni a, Mizo defender pahnih Zohmingliana Ralte leh Sena Ralte-te ṭum dang ang bawkin an khel ṭha leh hle.

Pune khaw club hi Blues champion-na dal theitu an ni a, Aizawl FC an la hmachhawn dawn avangin I League ṭanga MPL champion pet chhuak theitu an ni bawk.

Bengaluru coach Ashley chuan, "Nikum kha chuan pahnihna ni tur kha kan ang hrim hrim a, kuminah erawh champion tura âwm ber kan ni," tiin champion rinkai an la nih zel thu a sawi.

Blues boss Westwood hi club dang zawm tura anga sawi ni mah se amah berin Bengaluru chauh amah duhtu an awm thu a sawi a, club dang nena an sawi zawm chu thu belhchian dawl lo a nih thu a sawi.