Claudio Ranieri: Football thawnthu ngaihnawm ziaktu

"Kawng tinrenga sum kan chelekna khawvelah hian mi zawng zawng tan beiseina kan siamsak a ni," tiin Leicester City manager Claudio Ranieri chuan Foxes dinhmun thiam takin a sawi a, sum ngah ngah hmelṭha an tihna khawvelah club tenau Leicester City chu Premier League table chung berah a awmpui mek.

Nikum June, 2015-a Leicester City-in an manager Nigel Pearson an ban khan football khawvel mak tih a hlawh a, ropui taka Premier League hruai thlenga inhamtanpuitu manager an ban hi awm ti lo tam tak an awm. Pearson ban aia mak tih hlawh zawk a awm a, chu chu Greece-in an coach aṭanga an ban Claudio Ranieri an la lut ber kher kha a ni.

Ranieri maw?

Italian manager-in Leicester a zawm tirhin Tottenham manager hlui Harry Redknapp chuan Ranieri chu Premier League club enkawl tur a neih vangin vannei a tih thu a sawi a, Chelsea ban hnu manager hi a dah sang lo hle.

Liverpool midfielder hlui leh Leicester City lo enkawl tawhtu Dietmar Hamaan chuan, "Leicester-in Ranieri an ruai hi a mak thlawt a ni. Club ropui tak, fans nei ṭha tak an ni a, nakinah chuan Old Trafford-ah ni loin MK Dons khelmualah an khel ang tih a hlauhawm a ni," tiin League One thlenga tla thei dinhmunah Foxes an din thu a sawi.

Leicester midfielder hlui leh football pundit ni ta Robbie Savage chuan Foxes enkawl tura Ranieri ber kher thlan a ni chu duhthlanna chhe tak a nih thu a sawi a, English striker ropui leh Leicester tan pawha lo khel tawh Gary Lineker chuan, 'Tak tak maw?' ti chiahin zawhna a siam a, football khawvelin Ranieri lakah beisei a nei sang lo.

Tun hma chuan...

Player a siksawi kual nasat ṭhin avanga 'The Tinkerman' tia hminglem an vuah Italian manager hian King Power Stadium a pan hmain club leh ram 15 zet a enkawl hman a, player a nih laiin Roma, Catanzaro, Catania leh Palermo tan khel bawkin football khawvelah tawnhriat a ngah hman hle.

Ranieri-a'n football khawvela hriat a hlawh ṭanna tak erawh Cagliari a ni. Italian club hi a enkawl tirh chuan Serie C1 club niin kum thum chhungin division sang zawkah a kaisanpui zel a, Serie A thlengin Cagliari hi a kaipui a ni.

Cagliari-a chhuahsan hnuah Napoli chu kum hnih kaihruaiin nomawi erawh a chawipui lo a, Italian player ropui Gianfranco Zola chu Napoli-ah hian khawvel hriat turin a pho chhuak thung.

Kum 1993 khan Serie B club Fiorentina a enkawl leh a, a season hmasa berah Serie A a kaipui nghal. Fiorentina-a kum thum a cham chhungin Ranieri-a'n Coppa Italia leh Supercoppa Italiana a chawi bawk a, kum 1997-ah Valencia a zawm.

Valencia-ah pawh Ranieri-a'n hlawhtlinna a chhar chhunzawm a, UEFA Intertoto Cup leh Copa del Rey-a a champion pui bakah Champions League hial khelhpuiin Spanish club ṭha ber pawlah a din.

The Tinkerman hian Valencia a enkawl chhungin player naupang Gaizka Mendieta, Miguel Ángel Angulo leh Javier Farinos-te a chher chhuak a, Valencia legend goalkeeper Santiago Cañizares-a la lut chu a hmingṭhatpui hle bawk.

English football-in Ranieri an hmelhriat ṭanna erawh kum 2000-a Chelsea a zawm khan a ni. Blues a enkawl kum hian Frank Lampard, Emmanuel Petit, Boudewijn Zenden, Jesper Gronkjaer leh William Gal-las-te a la lut a, FA Cup final lutin league-ah pa-ruk-na an ni.

Chelsea dintu

Tun dinhmuna Premier League club lian Arsenal, Chelsea, Liverpool, Manchester United leh Manchester City-te history hi keu let nise City leh Chelsea hi a phek chhiar tur nei tlem ber an niin a rinawm.

Mahse, May 2003-ah khan Chelsea dinhmun thlak danglamin a awm a - he dinhmun hruai thlengtu chu Ranieri a ni. 2002-03 season-a an match hnuhnung berah Chelsea hian Liverpool an mikhual a, team pahnih hi an point hmuh zat a in an ve ve avangin a chak zawk zawkin Champions League an khel dawn.

Liverpool-in Sami Hyypia hmanga an hmahruaina goal an khung hnuah Blues-in Jesper Gronkjaer hmangin goal hnihin an chhanglet a, Steven Gerrard-a'n red card a hmuh chhunzawm bawk avangin Champions League khel turin Chelsea an tling.

Hetihlai hi London club lei tuma Russian sumdawng hausa tawntaw Roman Abramovich-a'n Chelsea leh Tottenham Hotspur a buk lai a ni a, Chelsea-in Champions League an khelh dawn avangin Stamford Bridge lam a hawi.

Pound maktaduai 20 (hetihlai hian CL khelin pound maktaduai 20 an dawng ṭhin) inchuhna inkhel anga ngaih kha Chelsea tan chuan an sumbawm lama dollar tluklehdingawn chuang luan luhtirtu a lo ni ta zawk a, vawiina Blues kan hriat kan hmuh theihna chhan a ni - manager Ranieri sawi hmaih theih a ni lo.

Italian manager hian Russian sumdawng hausa sum bawm zen chungin Chelsea hi Premier League-ah pahnihna a nihpui a, kum 49 hnua an club thlen san ber niin an club chanchina an goal chhuah tlem ber leh point hmuh hnem ber season a ni bawk. Blues hian Champions League semifinal hial an thleng bawk a, mah se Abramovich-a'n nomawi chawi a duh avangin Ranieri hi ban a ni ta tho a ni.

Italy lamah

Chelsea-in an ban hnuah Ranieri-a'n Valencia a pan a, UEFA Super Cup a chawipui hnuah ban a ni a, Italy lamah kir lehin Parma, Juventus, Roma leh Inter Milan a enkawl a, Roma a enkawl lai hian league match 23 chhung hneh loh nei loin a team kaltluanpui mah se Inter Milan-a Jose Mourinho ropui vanglai a tawng a, he season-a treble champion Inter lakah league nomawi an hloh bakah Coppa Italia final-ah an hneh lo bawk.

Russian sumdawng hausa Dmitry Rybolovlev-a'n Monaco a lei hnuah Ranieri hian May, 2012 khan Ligue 2 club hi a zawm a, a season khatnaah champion pui nghalin Ligue 1-ah a inhlankaipui a, Ligue 1-a a season hmasa berah pahnihna dinhmun luahin anmahni ang thoa sum hmang hnem Paris Saint Germain chiah tluk lo mah se a contract pawhsei sak a ni lo.

Ranieri-a'n 2014 FIFA World Cup zawhah Greece coach hna a chelh a, match li chiah a enkawl hman tihin Euro 2016 qualifier-a Faroe Islands an hneh loh avangin ban a ni - a coach nihna hnuhnung bera a record enin Leicester-in Ranieri an rawih tirha football expert tam takin mak an ti hi thil mak a ni hran lo.

Proud Man Walking

May, 2014-ah Chelsea-in Ranieri hi a hna aṭangin an ban a, Chelsea-a Italian manager ban a nih hma hian Stamford Bridge-a a dinhmun ngheh loh zia sawi nan media
ṭhenkhat chuan 'dead man walking' (a thihna lam pan mek) tiin a hming an phuah sak.

Mahse, Chelsea-a a hun tawp lam ziahna 'Proud Man Walking' lehkhabu chhuahtu hian amah sawiseltute chhang letin, "Mipuite chuan mitthi tawh ang maiah min ngai a, mah se ka ni lo. Min that tur chuan in beih ve fe a ngai ang," tiin Chelsea-in an ban vang mai maia hnual chi a nih loh thu a sawi.

Ranieri a ṭawng sual lo - kum 11 hnu-ah Premier League-ah a kir a, season hmasa lawka relegation battle sualtu club tenau Leicester City chu football khawvel barakhaihin league nomawi chawi thei dinhmunah a din pui ta - Ranieri a thi lo e!

Italian football federation president Carlo Tavecchio chuan, Claudio Ranieri chu Enzo Bearzot award for best Italian coach of the season atana thlan a nih thu Nilaini khan a puang.

He award hi Italian football federation-in kum 1982 World Cup-a nomawi chawipuitu coach Bearzot hriatreng nan kum 2011 khan an sem ṭan a, Ranieri hmain Cesare Prandelli (2011), Walter Mazzarri (2012), Vincenzo Montella (2013), Carlo Ancelotti (2014) leh Massimiliano Allegri (2015)-te'n he chawimawina hi an lo dawng tawh.