Europa League Final Inter Milan hmaah champion hnem ber Sevilla

Zanin dar 12:30 hian Europa League final khelh a ni dawn. RheinEnergieStadion, Cologne-ah Italian club Inter Milan leh Spanish club Sevilla an inhmachhawn ang - inkhel tawk tak tura ngaih an ni.

Season tirah kha chuan team pahnih hian Champions League an khel, group stage an paltlang loh avangin Europa League knockout stage aṭangin an khel chhunzawm. Antonio Conte leh Julen Lopetegui ten team din tharin inkhel hmuhnawm an chhawp chhuak ṭhin.

Conter-a'n Inter hi 3-5-2 hmangin a remkhawm ṭhin, wing back pahnih an awm avangin a ṭul hunah chuan tlarhnungah player panga an intlar mai ṭhin - Chelsea a enkawl lai pawha a naute a rem ṭhin dan a nih bawk avangin zaninah pawh kalphung ngai a hman a rinawm.

Sevilla lamin 4-3-3 formation an hmang tlangpui a, attacking game hmuhnawm an chhawp chhuak. Lopetegui-a'n Jesus Navas leh Sergio Reguilon te chu tlarhnung leh hmalam pui turin a chhawr thiam a, ball thiam Ever Banega thluak an hmang leh bawk ang.

Antonio Conte-a'n Inter Milan a dinthar leh mek - taksa, rilru leh thluak thlengin a siam danglam tih chu Shakhtar Donetsk lakah fiahin a awm, Ukrainian champion hi 5-0 ngawta sawpin final an inhlangkai.

Striker palian Romelu Lukaku-a'n tun season Europa League a khelh zawng zawngah goal a khung vek, amah thlawptu Lautaro Martinez hmuhnawmzia inhrilh nawn a ngai lo - Argentine forward hi club lian dang awh rawn a ni mek, tlarhma lam chu an ngaihtuahawm loh hle.

Mahse, Inter tana harsatna ni thei tur chu an tlarhnung a ni. Kum 34 mi Diego Godin hoa ding tlarhnung hi ball thiam rual Sevilla lakah an ding khawng zo ang em tih chu zawhna lian tak a tling. Keeper leh captain ni bawk Samir Handanovic chungah mawhphurhna a sang bawk ang.

Inter manager Conte chuan, "Europa League bikah chuan Sevilla hian keini aiin sulhnu an nei ṭha a, an player zingah pawh final boruak tem tawh an tam avangin a harsa dawn. Final hi chu team ṭha pahnihin an khel ṭhin, keini pawh kan ṭhat ve tho avangin beisei kan nei.

"Nomawi hi Italy-ah hawn kan duh, Inter-ah ngei title hi a kir leh tur a ni tih hi kan duhthusam a ni. Keini ang bawkin anni pawhin an ngaihtuah ve tho ang, kan theihna zawng zawng kan hlan dawn. Nomawi kan chawi a nih chuan kan phu vang a ni ang a, kan champion lo a nih pawhin theihtawp kan chhuah tho ang," a ti.

January thla khan Ever Banega chuan Saudi Arabian club Al-Shabab a zawm tur thu tihchian a ni a, zanin hi Spanish club tana a match hnuhnung ber a ni dawn. Argentine midfielder hi Inter Milan tana season khat khel tawh a nih avangin coach Lopetegui-a'n a hnen aṭangin thil tam tak a hriat belh ang.

Kum 32 mi Banega hi palian tak ni lo mah se khelmualah chuan a ball thiamna leh finna hmangin roreltu a ni ṭhin. A club hlui Inter lakah pawh a inthlahrung lo ang, ani bakah hian Manchester United an hneh ṭuma goal khungtu winger Suso pawh ven bik ngai a ni dawn.

Final thlirlawkin Banega chuan, "Player zawng zawng kan pawimawh vek dawn, ball ken leh thunun vel hi ka nuam tih zawng a ni a, chumi vang chuan ka pawimawh bik tihna a ni lo, kan pawimawh dan a inang vek. Kei leh club tan chuan inkhel pawimawh bik a ni ang.

"Sevilla kan ni a, final-ah tute nge kan tum dawn tihah ka buai lo, chak tumin kan khel dawn tih chauh ka hria. Club hian ka chungah kawng tinrengin ṭhat a chhuah, kei pawhin chu ṭhatna chu nomawi nen ngeia rulh let ka duh a ni," tiin champion chung ngeia mangṭha a duh.

Sevilla coach Julen Lopetegui chuan, "Inter hian Champions League khel tur coach leh player ṭha tak tak an nei, anni hneh tur chuan kan ṭhat dan bera khelhchhuah a ngai ang," a ti. Player thlir mai chuan Sevilla hi team nem zawk tura ngaih an ni, mahse Europa League a nih miau avangin dah hniam theih chu an ni bik lo.