Barca-in Koeman an tlangzarh Dutch coach-in Messi titi pui a tum

Barcelona chuan Thawhlehni zan khan media hmaah coach thar Ronald Koeman chu an tlangzarh ta a, Netherlands team aṭanga an sawmchhuah coach hian kum hnih chhung atan contract a ziak.

Kum 57 mi coach hi a hlawh zat tur tarlan ni lo mah se khawthlang media-te chuan kum khatah pound maktaduai 4.5-a hlawh dawn niin an sawi a, Everton-a enkawl laia kum khata pound maktaduai ruk a hlawh aiin tlem mah se Netherlands-a kum khata pound maktaduai 1.15 a hlawh mek aṭanga teh chuan a hlawh chhe lo. 

Koeman tan tun hi Barcelona enkawl châkawm lai ber erawh a ni lo tih a chiang a, an thiampuipa ber Lionel Messi meuh a 'nghin' avangin hnathawh tur tam takin a hmuak. Dutch coach chuan, "Barcelona-ah contract a la nei a, Barca player ni lai a ni. Team captain a nih miau avangin ka be thuai ang," a ti a, Koeman leh Messi indawr dan tur hi khawvel hriat châk chu a ni. 

Barca president Josep Maria Bartomeu chuan Messi-a pa a titipui tawh a, coach thar Koeman-a'n Argentine forward behchhana team a din tur thu thlengin a hrilh - mahse, Messi pa hian a fapa a titi pui phawt tur thu a sawi a, amahin thutlukna a pawt chat ngam lo. 

Bayern Munich laka 8-2 ngawta an mualpho hnuin Messi-a'n ngai a la awh leh rih lo a, a lam hnai tak tak tan chauh lo chuan biak pawh theih lohin chawlh a hmang mek - Messi hian result duhawm lo tak an neih hlim chuan a nu tak ngial pawh a be duh ngai lo a, Bartomeu leh Koeman tan biak pawh vat a harsa ang. 

Messi hian Bartomeu a ngaina lo tih chu hrilh nawn kan ngai lo a, Barca-a Messi chelh a duh chuan Bartomeu tan inthiar fihlim a, Koeman kuta engkim dah mai a fuh zawk dawn.

Koeman chuan, "Nou Camp-a cham turin Messi hi ka hmin a ngai dawn em ka hre lo. Khawvela player ṭha ber a ni a, khawvela thiam ber chu tupawhin an team tana khel turin an duh a, hmachhawn an châk ngai lo," a ti. 

Messi hi tun hma pawhin chhuak tur anga sawi thawm a lo awm tawh ṭhin a, tun ang em ema a derthawn erawh a awm ngai lo - dressing room titi aṭanga put ru anga an sawi pakhatah chuan Messi hian Barca chhuahsan ngei a tum. 

Hetiang boruak karah hian Barca chuan Messi contract-a lei chhuah theih a nihna man zat inziak chu pound maktaduai 627.96 a nih thu an tarlang thar a, Covid-19 vanga sum harsa karah Messi duhtu te hnawh bo dan an ngaihtuah.

Hriat tel tur erawh Messi hi June 2021-ah chuan a contract a zo tawh dawn - Barca hian a tui lo chungin chelh lui se nakkum nipui bazar-ah a thlawnin an player chuam hi an chan der thei. Barca dinhmun a him lo a, ngaihtuahna sen a ngai takzet. 

Koeman chuan, "Coach ka nihna ang chuan Messi hian a team hnehna a chanpui ṭhin avangin thawhpui ka duh. A theihna sang tak leh a thiamna hian a thlah lo a nih chuan kan hnena cham turin ka duh takzet a ni," a ti. 

Dutch coach hian Barcelona enkawl turin Netherlands team-a kum hnih contract a neih lai chu a kalsan a, Catalan club tan hian 1989-1995 a lo khelh tawh avangin Barcelona chhungkua hrechiangtuah a inchhal ang. 

Koeman chuan, "Bayern laka kan hlimthla kha thai bo a, kan nihna tak kan phochhuah leh a ngai. Kha inkhela Barca kha chu fan-ten an hmuh duh Barca a ni lo. Inpekna leh professional kan nihna pholan a ngai a, Barca kawr i ha phak a nih chuan i inchhuang tur a ni. Heng zawng zawng hi kan ti thei a nih chuan hmanni lawka in hmuh Barca nen khan a danglam viau ang," a ti. 

Messi hi Paris St-Germain leh Manchester City-in an duh nia sawi a ni a, Arab suma insiam lian an nih avangin Messi lalut turin sum lamah chuan buaina an nei lo ang. Messi-a'n Ronaldinho hnua khelhpui nuam a tih ber nia an sawi chu PSG forward Neymar a ni a, talent pianpui player ni mah se City boss Pep Guardiola hi tun dinhmun a thlen theih chhanah thai bo a thiang lo ang. 

A tawi zawnga sawi chuan Messi hian khelhpui nuam a tih em em leh a coach ngainat em em inkarah duh a thlang thei a, a tihtauh khum, amah siam liantu Barca-in chelh hram duhin an thlir reng bawk.

Koeman chuan, "Team ṭha tak din turin rim takin kan thawk dawn a, mahse Bayern laka kan thil hmuh avang khan thil tam tak thlak danglam a ngai ang. Kan zahawmna nei let leh tur chuan thawhrim a ngai takzet dawn a ni," a ti.  

Bartomeu-a'n Barcelona team thar din an tum thu a lo sawi tawh bawk a, Catalan club hian player pawh an hralh nual ang tih a chiang. Zawhna awm leh ta erawh Messi hian Barca 'indinthar' leh hun chhung hi a nghak peih kher ang em, tih chu a ni.

Kum 33-ah pawh Messi-a'n theihna a la neihsanzia enin chuai mai tura dah chi a ni lo a, mahse a vanglai hun a liam ṭan ve mek tih erawh phat theih a ni bik lo. Pep-a hoa Barca an vul chhoh lai ang hun kha tawng leh tur chuan Barca hian kum khat tal an mamawh dawn. 

Heng zawng zawng thlir chung hian Messi hian Barca indinthar lehna hi a nghak peih kher ang em, tih chu zawhna chhan harsa tak a ni - Barca-a kir leh tur anga sawi Neymar hi a pan zawk a nih pawhin mak ti suh. 

Bartomeu-a'n player tam tak hralh dawn mah se Marc-Andre Ter Stegen, Nelson Semedo, Messi, Frenkie de Jong, Clement Lenglet, Ousmane Dembele leh Antoine Griezmann-te chu khawih thiang lo an nih thu a sawi tawh. 

Barca President hian Gerard Pique (June 2022 thleng contract nei), Sergio Busquets (June 2023), Luis Suarez (June 2021, kum khat pawhsei theih), Jordi Alba (June 2024), Samuel Umtiti (June 2023), Ivan Rakitic (June 2021) leh Arturo Vidal (June 2021)-te hming a lam tel lo. 

Busquets leh Alba-te chuan an contract neihlai anga Barca-in sum an pe tla vek a nih loh chuan an chhuah loh tur thu an sawi a, Suarez pawh a bang lo - chhuak tur anga sawi player pathumin ualau takin an contract anga sum pek an phut tihna a ni a, Koeman tan hemi chinfel ringawt pawh hi a harsa dawn. 

Kum 2007-a Valencia a enkawl khan Koeman hian club senior player Santiago Canizares (299 appearances), David Albelda (213) leh Miguel Angel Angulo (299) te chu a mamawh loh thu a hrilh a, a tawpah amah zawk a chhuak - fimkhur a ṭul tawh ang. 

Koeman hian World Cup 1998-ah khan Guus Hiddink thachhang dawltu niin Netherlands team chu a lo kaihruai tawh a, 1998-2000 inkarah khan Nou Camp-ah Louis van Gaal-a assistant-in a lo awm tawh bawk. 

Netherlands lamah hlawhtlinna hmasa chharin Ajax leh PSV Eindhoven chu league-ah a champion pui a, league-ah Valencia chu beisei phak pui lo mah se Copa del Rey nomawi a chawi thung. 

AZ Alkmaar leh Feyenoord-a hun a hman hnuah kum 2014 khan Southampton a zawm a, season hnih chhunga pasarihna leh parukna nihpuiin a hming a chher hle. Kum 2016-ah Everton panin a season hmasa berah Europa League khel turin a tlinpui a, October 2017-ah relegation zone-a an awm vangin an ban. 

Mahse, February 2018 khan Netherlands team a enkawl ṭan a, Everton mangchhia a mangṭha - World Cup 2018 khel tura tling zo lo team kha UEFA Nations League final-a khelhpui a, Euro 2020 khel turin an tling bawk - Barca fan-te chuan Everton chanchina transfer budget pek hnem ber nichunga a hlawhchhamna ai chuan Netherlands tlu chhe mek a tun din lehna chu sawi nuam an ti zawk ang. 

Hei le, a lo kal e - Dutch tlangval huaisen!