UEFA Nations League September-ah inkhel entu awm a rem dawn lo

Covid-19 vangin infiamna khawvel a buai chhunzawm zel a, Europe-a football thuneitu sang ber UEFA chuan September thlaa Nations League match khelh turah fans an awm loh tur thu an puang. 

Nilaini khan UEFA hnuaia ram 55 aiawh te chu an inrawn khawm a, thla thara Nations League round hnih khelh tur awm chu entu awm loa kaltlangpui turin thutlukna an siam. 

Hetihlai hian September 24-a UEFA Super Cup inkhel awm tur chu enchhin nan hman a ni dawn a, fans tlem tein a hmunah inkhel en a rawm dawn - he inelna hi Champions League leh Europa League champion-in an inchuh ṭhin a ni. 

UEFA Nations League hi ram leh ram inkara match khelh ṭhin friendly match-te a hlut zawk theih nana ruahman a ni a, nikum final-ah Portugal chuan Netherlands hnehin champion hmasa ber an ni. 

March 3 khan Nations League draw hi neih a ni tawh a, September - November, 2020 inkarah league round khelh a ni ang a, September - October, 2021 inkarah Nations League finals khelh a ni ang a, March 2022-ah relegation playouts khelh a ni ang.

UEFA hnuaia ram 55 chu UEFA National Team Coefficient Rankings-a an dinhmun a zirin league paliah ṭhen hran an ni a, League A, B, C leh D-ah dah an ni. 

League A, B leh C-ah hian group pali ṭheuh an awm a, group tinah ram pali zel an awm. League D bikah hian group pahnih an awm a, group pakhatah team pali awmin pakhatah pathum an awm thung. 

Team-te hi home & away hmangin an inhmachhawn a, League A-a group tina a chung ber te chu September - October, 2021-a Nations League finals khel turin an tling ang. 

Nations League finals hi semifinal leh final hmanga khelh tur a ni a, League group tina a chung ber te khan knock out system-in champion tur an zawng dawn a ni. 

League A group tina hmahruaitu ṭheuhin finals an khelh laiin a mawngphah ṭheuh chu Nations League khelh leh hun a tan League B lamah an tla thla thung. League B-a group palia hmahruaitu ṭheuh chu League A khel turin an tling ang a, a mawngphah luahtu chu League C lamah an tla thung ang. 

League C-a group tin hmahruaitu pali chu League B-ah an kai sang a, a mawngphah luahtu paliin relegation playoff an khel ang - League D-a group pahniha a sang zawk ve ve hi League C khel turin an tling dawn. 

FIFA World Cup 2022 qualifier chu UEFA-in a hranpain a kalpui dawn tho a, group 10-ah ṭhen hran niin group tina a sang ber 10 chu Qatar-a inelna hmachhawn turin an tling nghal ang. 

UEFA-in World Cup-ah hmun ruak 13 an nei a, team 10 an tlin hnuah hian tling thei team pathum dang an la awm tihna a ni - hetah hian Nations League a ṭangkai chiah dawn.

Qualifier-a group tina pahnihna ṭheuh, team 10 leh Nations League-a an group-a hmahruaitu zinga a sang pahnih (UEFA Nations League rankings behchhanin), qualifier aṭanga tling phak lo bawk te chuan second round an khel leh ang a, hmun ruak pathum an inchuh leh ang.