Mohun Bagan leh ATK an inzawm!
Thu lengvak awm reng chu a tak ram chantir a ni a, India rama club hlun ber pawl Mohun Bagan chu Indian Super League club ATK nen an inzawm ta!
Kolkata club lian pahnih inzawm hi a hming tur puan la ni lo mah se ATK leh Bagan hming a bet tel ve ve dawn tih sawi a ni a, ATK neitu RPSG Group chuan 80% share an nei ang a, Bagan lamin 20% an chang thung ang.
Club pahnih hian an league khelh lai ISL leh I League chu club hran an nih angin an khel zo ve ve dawn a, June aṭangin club pakhat angin an awm ṭan dawn a ni.
Season thar aṭangin AIFF hnuaia league sang ber ISL-ah an khel ang a, inelna dang pawh an hmachhawn ang. Club pahnih inzawmah hian ATK leh Bagan fans lam an lungawi lo hle!
Ka pa tan!
RPSG Group chariman Dr. Sanjiv Goenka chuan, “Kum 200 zet sulhnu lo nei tawh kan ni a, kan chhungkuaa Mohun Bagan kan lawmlut ta hi ka lawm takzet a ni.
“Ka pa RP Goenka kha Mohun Bagan member a ni a, Bagan nena inzawmna kan nei leh thei ta hi ka tan phei chuan a lunglenthlak lehzual hle a ni,” a ti. Goenka chuan club ṭhatna tura an thawh ho vek tur thu sawi zuiin, “A tawpah chuan mimal thu emaw chapona ten ro a rel thei lo a, he club tana ṭha tur ngaihtuah hian kan thawk ho vek dawn a ni,” a ti a, club ṭha tak neih a inbeisei. Kum 130 zeta upa Bagan hi sum lamah an talbuai a, hun rei tak chhung chu sponsor tu tur zawngin an lo buai tawh - ATK an lo lang a, an ṭang zo ta lo.
Bagan insawifiahna
Mohun Bagan general secretary Swapan Sadhan Bose chuan, “Tunah chuan duhthusam leh a tak ram chu an inkuah chial tawh ang a, Indian football-a team thar duhawm tak a hring chhuak dawn a ni,” a ti.
Bose chuan sawi zawmin, “Indian football-a hmasawn zel tur chuan sum tam zawk thawh theitu leh corporate lian tak kan mamawh a, hei hi hawisan rual loh thudik a ni tlat si a ni,” a ti a, sum mamawh vanga ATK inzawmpui an nih thu a pha lo.
Bagan hotupa chuan an fans rilru na te hnem zuiin, “Bagan fans rinawm maktaduai tel hnenah hei hi ka sawi duh - hla chu mawi takin a ri reng ang a, thuin a mawina kan belhchhah dawn a ni,” a ti! Kolkata club hi Kibu Vicuna enkawlna hnuaiah an khel mek a, ATK coach ni mek Antonio Lopez Habas chuan season thara ATK-Bagan hi a enkawl dawn niin an sawi bawk.