Olympic champion Takahashi a chawl

Olympic badminton champion Ayaka Takahash chuan nimin khan inkhelh a chawlhsan thu a puang a, nakkuma Tokyo Olympic khelh hunah hmeichhe doubles huanga gold medal a kawl lai humhim turin a inlan dawn lo tihna a ni.

Rio Olympic-ah khan Japan nula Takahashi leh Misaki Matsutomo te ṭangdun chuan Denmark mi Christinna Pedersen leh Kamilla Rytter Juhl te hnehin gold medal an la, an ramin badminton huanga Olympic gold medal an lak hmasa ber a ni hial.

Kum 30 mi Takahashi hian a chawlh chhan hi coronavirus vanga inelna neih hun an sawn vang a nih thu a sawi. Takahashi chuan, "August 31 hian player ka nih laia ka hun chu a zo ang. Chawl pawh ni ila taksa chu ka la sawizawi reng thung ang.

"Zep tur a awm lo, kum khat chhung atana Olympic an sawn hla khan rilru a ti hnual a, season khat chhung rim taka inkhel leh tur chuan ka tlin ka ring tawh lo," tiin badminton khawvel a mangṭha thu a sawi, a chawl hi Japan tan channa lian tak a ni.