Olympic khelh beiseitu Murray

Andy Murray chuan tennis khawvelah a hun hnuhnung a hmang mek tih a hria a, inkhelh a chawlhsan hma ngeiin infiamna khawmpui lian Olympic khelh leh ngei chu a duhthusam a nih thu a sawi.

Grand Slam vawi thum champion tawh Murray hian kumin May thlaah kum 37 a tling tawh dawn, tun hnai kum thum chhung vel chu hliam vangin a buai reng a, a inkhelh theih loh lai a tam zawk hialin a rinawm.

Tun hnai khan Dubai Tennis Championship khel ve leh mah se second round-ah Ugo Humbert a ngam lo. Tournament aṭanga a chak loh apiangin a chawlh hun tur zawhna a dawng ta deuh ziah, chawlh erawh a la sawi duh bik lo.

Britain tlangval Murray chuan, "Vawi khat tal chu ka la khelh ve leh ka beisei," tiin Olympic chungchang a sawi. London khawpuiin Olympic an thlen ṭum khan Murray hi a champion a, kum li hnuah Brazil khawpui Rio-ah a champion leh bawk.

Tun dinhmunah Murray hi world number 67 a ni a, a ranking a siamṭha hret a nih loh chuan Paris Olympic a khel phak dawn rih lo. Olympic-ah hian world number 56 chinin singles inelna an hmachhawn thei ṭhin a ni.