Inter leh Napoli an hrang

Serie A champion tura rinkai ber Inter Milan chuan an mikhual Atalanta 4-0 in an sawp a, inkhel dangah champion lai Napoli chuan Sassuolo mualah 6-1 in hnehna an chang chiang ve hle bawk.

Striker ṭha Victor Osimhen chuan Naples club tan hattrick siamin a team a chakpui, a awm loh hlanin lo che buai deuh mah se season chawhnu lamah chuan team hlauhawm an ni chho leh mek - Champions League khelh beiseina a la nung.

Inter an vung

Nilaini zan Serie A inkhelah Inter tan Matteo Darmian, Lautaro Martinez, Federico Dimarco leh Davide Frattesi ten goal khat ṭheuh an khung a, an mikhual Atalanta lakah zahngaihna an lantir duh lem lo a ni.

A tira ruahman dan chuan tuna match an khelh tak hi Janaury thlaa khelh tur kha a ni, mahse Italian Super Cup khelh vangin league match hi an sawn a, kumina match 10 chak vek thei Inter an buai phah chuang lo.

Player ṭha leh langsar ṭhenkhat Marcus Thuram, Hakan Calhanoglu, Francesco Acerbi, Stefano Sensi leh Juan Cuadrado te an inlan thei lo chung pawhin Inter Milan an chungnung hle a, a khat mawi tawkin goal an khung deuh reng.

Inter Milan defender Alessandro Bastoni chuan, "Tun anga team nghet leh ṭha kan neih theih chhan chu coach Simone Inzaghi hi a ni, a kaihhruaina hnuaiah hian player tam tak chu kan puitling rual a, chu chuan nghawng a nei lian hle.

"Kum nga liam ta vel kha chuan tun ang match hautak khel tur te hian kan la puitling lo tlang hle, mahse Inzaghi hian kan chungah rinna a nghat tlat a, a tawpah chuan a mi rin angin kan khel thei ta," tiin an coach a dahsang hle.

Italian coach Inzaghi leh an striker ṭha Martinez te chu European club lian dangten an chuhpui dawn tih a chiang a, thawm pawh a awm. Hetiang boruak karah hian Inter director Beppe Marotta chuan anni pahnih chu khawih chet thiang lo an nih thu a sawi.

Osimhen a inlar

Season hmasa khan Napoli hian khawvel barakhaihin Serie A nomawi an chawi a, an champion theih chhan langsar tak pakhat chu Victor Osimhen a ni. Nigeria international hian club lian dangte sawmna hnawlin Naples khawpuiah a awm zui - mahse hliam vangin a buai ta fo.

Tunah erawh Osimhen a dam chiang tawh a, goal thum a khung leh ta hem mai. A goal khung pathum hi box chhung aṭang vekin a ni a, a hmasa pahnih hi angle zim angreng tak aṭanga khung niin a hnuhnung ber erawh Sassuolo defender pet sual vang a ni thung.

Osimhen bakah hian Kvicha Kvaratskhelia-a'n goal hnih khungin, defender Amir Rrahmani-a'n goal khat a thawh bawk. Sassuolo tana Uros Racic-a goal hmahruai khung chuan kawngro a su thui ta lo hle a ni.

Napoli winger Matteo Politano chuan, "Tuna kan result ang nei tur hian kan nghak rei ta hle, tunah chuan training-na lama kan zir angin khelmual chhungah kan tithei ta, match lehpekah pawh ṭha takin kan khel thei ngei ang.

"Goal kan khung hnem a, keimahni goal kan venghim ṭha viau bawk. Hetiang match hi chuan inrintawkna min siamsak a, taksa leh rilruah nghawng ṭha tak a nei," tiin a sawi a, coach thar Francesco Calzona lakah beisei a nei sang hle.

Kum 55 mi Francesco Calzona hian February 19 aṭang khan Napoli hi a enkawl, a match hmasa pahnihah Barcelona leh Cagliari te a inhnehtawkpui a, match pathumnaah chuan team an indin nghet chho tih a takin an lantir.

Serie A Results

Sassuolo 1 - 6 Napoli

SAS: Uros Racic 17'

NAP: Amir Rrahmani 29'; Victor Osimhen 31', 41', 47'; Kvicha Kvaratskhelia 51', 75'

Inter Milan 4 - 0 Atalanta

INT: Matteo Darmian 26'; Lautaro Martinez 45+1'; Federico Dimarco 54'; Davide Frattesi 71'

Team Dinhmun

# Team Pld W D L GF GA GD Pts

1 Inter Milan 26 22 3 1 67 12 55 69

2 Juventus 26 17 6 3 41 19 22 57

3 AC Milan 26 16 5 5 50 32 18 53

4 Bologna 26 13 9 4 39 23 16 48

5 Atalanta 26 14 4 8 48 28 20 46

6 AS Roma 26 13 5 8 48 32 16 44

7 Fiorentina 26 12 5 9 39 30 9 41

8 Lazio 26 12 4 10 32 28 4 40

9 Napoli 26 11 7 8 40 30 10 40

10 Torino 26 9 9 8 25 25 0 36

11 Monza 26 9 9 8 27 30 -3 36

12 Genoa 26 8 9 9 28 31 -3 33

13 Empoli 26 6 7 13 22 40 -18 25

14 Lecce 26 5 9 12 24 43 -19 24

15 Udinese 26 3 14 9 25 40 -15 23

16 Frosinone 26 6 5 15 34 55 -21 23

17 Verona 26 4 8 14 23 36 -13 20

18 Sassuolo 26 5 5 16 32 54 -22 20

19 Cagliari 26 4 8 14 24 47 -23 20

20 Salernitana 26 2 7 17 20 53 -33 13