Intlansiak a tam mah mah - Verstappen

Max Verstappen chuan Formula 1 season thar a thlirlawk a, intlansiak vawi 24 ngawt awm tur chu a tam mah mah tih a sawi - car intlansiakna sang berah hi season khat chhunga inelna tam ber ṭum an tawng dawng.

Tun kartawp hian Formula 1 season thar hi an tlan tawh dawn, inelna hmasa ber atan Bahrain International Circuit-ah Bahrain Grand Prix an tlan dawn, champion lai Verstappen hi en bik hlawh a ni leh dawn.

Kum 26 mi Verstappen chuan, "Hmanni deuh pawh khan ka sawi tawh, ka ngaihdan hi a la danglam lo. Kei chuan kum khata intlansiak 24 awm chu a tam ka tilutuk, thawk lakna hun a awm dawn meuh lo tihna a ni.

"Intlansiak hi chu nuam ka ti a, ka infiamna ngainat ber pawh a ni. F1 ṭhatna tur leh hmasawnna tur ngaihtuah chunga thil tih a nih ngei ka ring a, chutihrualin nakin zelah chuan hetiang aia tih tlem deuh a nih ka beisei," tiin a sawi.

Spanish driver Fernando Alonso pawhin inelna neih tur thlirlawkin, "F1 ka luhchilh tirh kha chuan season khatah intlansiak 16 kan nei, a hnuah 18 kan nei leh a, a hnuah 20-ah tihpun leh niin hei hi a tawk thawkhat hle.

"Tunah chuan intlansiak 24 tehmeuh a awm dawn, hei chu a tam uchuak mah mah a ni. World champion ni turin a hautak dawn lutuk a, mihring hian tlin tawk kan nei tih pawh hriat a ngai," a ti.

Alonso hian F1 title vawi hnih a la tawh, tunah chuan kum 42 mi ni tawhin season tharah hian Aston Martin car a khalh leh ang - season hmasa khan beisei phak bakin a che ṭha, kuminah pawh mipui lawm hlawh zinga mi a ni leh ngei ang.