Liverpool-in Michael Edwards lak kir an tum

Premier League club langsar Liverpool chuan club sporting director hlui Michael Edwards lak kir an tum a, Anfield-a kir tura an thlemna hmasa ber erawh Edwards hian a lo hnar tawh.

Liverpool hi an coach atchilh rawn Jurgen Klopp chuan season tawp rualin a chhuahsan dawn a, January khan club sporting director Jorg Schmadtke chuan a chhuahsan bawk. Hei vang hian Reds thuneitute an buai a, tun hnaia an hlawhtlin theih nana tha thawhhlawk tak Edward hi thlem kir an tum.

Kum 2011 khan Edwards hian Liverpool hi a lo zawm tawh a, kum 2016-ah khan Sporting Director atan hlan kai niin, Reds hlawhtlin nana player thawhhlawk keeper Alisson Becker, defender Virgil van Dijk leh forward Mohamed Salah ten Anfield an pan theih nana ngaihtuahna sengtu langsar a ni.

Hei vang hian Liverpool neitu Fenway Sports Group chuan an Sporting Director hlui hi neih let leh an duh. Tun dinhmunah chuan Michael Edwards hi club hrang hrang nen sawizawm ni mah se, sports advisory company Ludonautics-ah Consultant-in a thawk mek.

Ludonautics hi kum 2012-2023 inkara Liverpool director of research Ian Graham-a din a ni a, Liverpool tan dawr an harsa lo ang. League Cup champion hlim Liverpool player langsar zingah defender Trent Alexander-Arnold, Van Dijk leh Salah te chu kum 2025 nipuiah an contract a zo tawh dawn a, hei vang hian Liverpool hian Sporting Director thar neih thuai an duh.