Sheffield-ah Ramsdale a kir ta

Premier League club Sheffield United chuan an goalkeeper hlui Aaron Ramsdale chu Bournemouth aṭangin pound maktaduai 18.5-in an la let a, kum li chhung atan contract an ziahpui.

Kum 22 mi Ramsdale hian kum 2017 khan Sheffield aṭangin Cherries hi a zawm a, a hunlaia pound maktaduai khat man goalkeeper hian kum 2020 a thlen meuh chuan pound maktaduai 18 chuangin a club hlui a zawm leh ta. 

Season hman zawh taka Bournemouth tana Premier League match 37 kheltu hi club player of the year-ah thlan a ni a, Blades-a (Sheffield sawina) first choice goalkeeper Dean Henderson chuan a loan hun a hman zawh avangin Sheffield tan first choice a ni ang. 

Ramsdale chuan, "Ka in tia ka lo sawi ve ṭhin hmuna ka lo kir thei hi ka lawm takzet a ni. Ka kalsan tak ka ṭhiante leh ṭhian thar turte nena inhmuh ka chak takzet," a ti a, Sheffield tana a khelhpui ṭhinte nena an khel ho leh thei tur chu a lawm hle. 

Blades boss Chris Wilder chuan, "Tuna kan transfer hi Dean chungchang a ni lo a, Aaron lakluh chungchang a ni. Aaron hi kan player hriat sa a ni a, Chesterfield leh AFC Wimbledon-a loan-a a khelh laia a hmasawn dan kan hmu a, tun season-ah pawh khan kan thlithlai ngun hle a ni. 

"Tun ang boruakah board-in kan duhna te min tih hlawhtlinsak hi ka lawm hle. Aaron hi kan rama goalkeeper ṭhangduang ber pawl a ni a, kan nei thei hi ka lawm takzet a ni," tiin a sawi.