Thih leh Dam : Mizoram tawpna tur Railways?

FIFA Santosh Trophy-ah Mizoramin chet ṭhat ṭum aiin chet chhiat ṭum an ngah a, Maharashtra leh Manipur an hmachhawn ṭum anga an khelh chuan vawiin hi an tawpna tur a ni. Chutihrualin Lalsangzuala Hmar hote hian Delhi an hmachhawn ṭum anga an khelh chuan knockout stage an lut ang.

Vawiin chawhma dar 10:00 hian Mizoramin Railways an hmachhawn dawn a, hnehna an chang a nih chuan midang result nghah kher ngai loin quarterfinal an lut nghal ang. An inhnehtawk a nih erawh chuan zanin dar 7:00-ah Karnataka-in Maharashtra laka point an hlawhchhuah a ṭul dawn. Chutihrualin Mizoram hi an chak lo erawh chuan an tla.

Dam beiseina

Mizoram hian Manipur laka 4-1 ngawt an tlawm avangin damna famkim chan a harsa tawh dawn a, chutihrualin Itanagar an pan chhan ber nomawi beiseina erawh a la inhawng. February 29, Ningani zana Delhi-in Maharashtra an hneh zarah Mizoram kutah engkim a la awm.

Golden Jubilee Stadium-ah Maharashtra leh Delhi inkhel a nung takzet. Minute hnihna lekah Maharashtra-in Mohammed Ansari hmangin an khung nghal. Mahse, Delhi-in Bhaaranyu Bansal hmanga minute sarihnaa an chhanlet hnuin minute 43-naah Milind Negi-a'n a khung belh.

Maharashtra tan an kuta engkim awm turin chak a ngai a, second half-ah na takin an nawr. Minute 65-naah Ansari-a'n siphurh sutna goal a khung a, chak tumin an nawr zui. Mahse, Delhi-in injury time-ah pawh minute sarihnaah Sridarth Nongmeikapam hmangin chakna goal an khung.

Delhi hi chak lo pawh ni se Mizoram hi an chak hrim hrim chuan knockout stage an lut sa. Chutihrualin Delhi an chak chiah hian Manipur hnung zuiin Delhi leh Railways an tling. Hmunruak pakhat la awm hi Mizoram, Maharashtra leh Delhi ten an inchuh dawn tihna a ni a; Mizoram tan tlak hlau Railways aiin tling tawh Railways hmachhawn hi a awlsam hret a rinawm bawk.

Thih theihna chu

Mizoram tan dam beiseina a awm rualin quarterfinal thlen hi kawng awlsam a la ni chuang lo, a chhan chu Railways hi defensive khel thiam team an ni tlat. Match hmasa bera Manipur an hmachhawn ṭumin kawng engkimah ngam lo mah se hun tawpah 1-1 a ni tlat.

Match hnihnaah Railways hi an chesual a, Delhi lakah 4-0 in tlawm. Chutihrualin Delhi goal bawh na tak hi an dawl thei viau a, a tawpa goal an chhuah tam chhan erawh chetsual vang a tih theih. Maharashtra lakah Railways-in defensive game tho an khel a, goal an khung hmasak zawk bakah Mahrashtra player Mohd. Rizwan red card hmuh an vanneihpui a, 2-1 in an chak.

Karnataka lakah Railways hi a bet zawkah an ṭang leh a, an thiampuipa Subrata Murmu-a'n goal awmchhun a khung. Railways hi 1-0 a hnehna chang tur hian an vannei ringawt lo, awmze neiin defending game an khel a, goal venghim turin an thawkrim. Mizoram pawh hi Manipur, Maharashtra leh Karnataka ang thoin Railways lakah hian chesual thei an ni.

Mizoram dinhmun chu

Manipur hmachhawn ṭuma inhliam vanga fist half-a lak chhuah MPL10 best midfielder H. Lalbiakthanga chu hliam vangin nimin training hnuhnung ber a zawm lo a, group match hnuhnung berah a khel thei dawn lo. Hliam vanga thoa halftime-a lakchhuah Laltluangliana'n training zawm tawh mah se a dam ṭhat a ṭul avangin a khelh aiin a hahdam a rinawm zawk.

Mizoramin Manipur lakah goal li zet an chhuah a, tun inelnaah goal 10 tehmeuh an chhuah tawh avangin tlarhnung inenfiah a ṭul dawn. Coach Lalsangzuala Hmar-in tlarhnung a siamrem a rinawm a, Chhinga Veng defender FC Lalhmunmawia'n khelhna hun ṭha a nei tura ngaih a ni. Chutihrualin FC-a kawppui tur hian Police defender Lalhmunawmia (Ahmuntea) leh captain Lalrinchhana Tochhawng (Chanmari FC) te pahniha pakhat zawk hi an awl a ṭul dawn.

Defensive midfielder BT-a a inhliam vangin Kawnpui tlangval Lalengmawia tan hun ṭha a inherchhuah leh theih a rinawm a, chutihrualin Lunglei tlangval HP Lalremruata pawhin bul a ṭan zawk thei bawk. Winger-ah Sawma Tlangte leh Lalthankima (Thathana) te bawkin bul an ṭan a rinawm a, Ainawn Veng rawlthar Thathana hi nimin training-naah a inbilh sual. Mizoram jersey no. 7 Thathana hi a khel thei lo a nih chuan Vanlalbiaa Chhangte emaw Vincent Lalduhawma emawin a ai an awh ang.

Tlarhma lam erawh khawih chet a rinawm lo a, goal hmaah MC Malsawmzuala ke a hmui viau a; a kawppui MS Dawngliana'n hmasawn hret a mamawh. Midfield-ah R. Malsawmtluanga a la thawkrim reng a, ani hi tun dinhmunah chuan khawih chet thiang loa ngaih a ni.

Santosh Trophy khel tur hian Mizoram tan player 22 thlan an ni a, inhliam vangin striker Lalnunzama'n tiang a la hawl. Player 21 dang erawh hun pawimawhah an lut vek tawh a ni. Mizoram manager K. Lalenghluna (Maenga) chuan, "Manipur hneh loh hrehawm kan ti tlang a, Railways laka kan chak loh phei chu ka ngaihtuah ngam lo. Chak tumin theihtawp kan chhuah ang. Chumi tur chuan coaching staff leh player-te kan la thawkrim reng a, a hma ai mahin inkhuahkhirhna pawh a khauh tawh zawk," tiin Vanglaini a hrilh.

Mizoram hian an tihsual siam ṭhat nan video session an kalpui reng a; chutihrualin Manipur an hneh loh zan aṭangin player-ten smart phone pawh coaching staff bulah an thehlut vek. Coaching staff-in player-te hi room tinah an tlawh kual a, alarm set nan bera an hman phone an kawl tawh loh avangin coaching staff-in zing thawh hunah an tlawh kual leh vek bawk.

Mizoram hian nomawi beiseina nei turin quarterfinal luh a pawimawh a, kum tawpa neih tur National Games-a tel pha turin knockout stage luh ngei hi a ṭul bawk. Santosh Trophy-ah Mizoramin kum nga hnuah final round an khel leh chauh a, hei vang hian nikuma neih National Games-ah pawh Mizoramin football team an tir thei lo a ni.