Pathianni zan dar 9:00-ah Manchester Derby
Manchester City chuan Ferbuary 3, Pathianni zan dar 9:00 hian Etihad Stadium-ah Manchester United an mikhual dawn. Pep Guardiola hote hi Premier League champion tum an ni a, Erik ten Hag-a hote hi season thara Champions League khelh tum an ni thung.
Manchester Derby hnuhnung ber hi nikum October 29 khan Old Trafford-ah khelh a ni a, Man City 3-0 inhan chak. Etihad Stadium-a league match hnuhnung pahnihah City hian an hmelma Man United hi 6-3 leh 4-1 in an sawp a, United ṭantute bakah champion beiseina Liverpool leh Arsenal ṭantute tan beiseina neihsan a har ang.
Hojlund a damlo
Manchester United-in hliam an ngah hle. Tun hnaia che ṭha zet Ramus Hojlund a la inhliam vangin Danish striker hian Manchester City a la hmachhawn thei dawn lo. Hojlund chu dam se; Alejandro Garnacho leh Marcus Rashford ten an thlawp bawk chuan United tan City ṭhiah theihna kawng a inhawng ang.
Mahse, Hojlund tel loin an khel dawn a, Man United goal bawh a na tawk dawn lo. Hei vang hian Ten Hag-a hoten goal an chhuah loh a ṭul dawn. Man City hian FA Cup-ah Premier League club tho Luton lakah goal ruk ngawt an khung a, Erling Haaland-a'n goal nga ngawt a khung.
Derby match-a goal khung nuamtitu Haaland hi United tlarhnung tan ven tham a ni ang. Ten Hag-a hote tana harsatna belhchhah turin Harry Maguire a inhliam a, a dam hman a rinawm loh. Tyrell Malacia, Anthony Martial, Lisandro Martinez, Mason Mount, Luke Shaw leh Aaron Wan-Bissaka te an inhliam mek bawk.
Man United hian City khelh hma intihphur nan FA Cup-ah Nottingham Forest an hneh a, tlarhnung an phuahchawp ṭan. Raphael Varane, Victor Lindelof leh Diogo Dalot te kiangah Sofyan Amrabat a ding a, Moroccan midfielder hi wing back atan chuan a tlan muang a, City winger lakah chuan a buai ve viau a rinawm.
Hei chauh hi a la ni lo, captain Bruno Fernandes leh Raphael Varane te dinhmun pawh a chiang lo. Chutihrualin Ten Hag-a'n tawnhriat nei ṭha player pahnih hi an dam hman a beisei a, an khel thei lo a nih erawh chuan Etihad Stadium-ah a zawn zata a vawi thum nan mualpho tura rilru siamfel mai pawh a ṭul hial ang.
City ṭha zawk
Man City-in Luton an hmachhawn ṭumin Ederson, Ruben Dias, Rodri leh Phil Foden te an hahdamtir thei a, an player ṭha tel lo chung hian 6-2 in an chak tho. Pep-a hote hi season ṭantirh ai khan an ṭha tawh zawk a, a chhan chu Haaland chawm tura Kevin De Bruyne a awm tawh vang a ni.
Haaland-a'n goal nga zet a khung zanah De Bruyne-a'n vawi li assist a nei a, an pahnih inkawp dan hi chu inhliam vanga buai Man United tan dan a har dawn. Chutihrualin City hi KDB leh Haaland tel lo pawhin champion rinkai an ni phak tih hriat a ṭha a; tun dinhmunah chuan Pep-a'n player tupawh luhtir se City hi chak tura rin zawk an ni dawn.
Hei bakah hian City tan Premier League nomawi humhim turin chak hii a pawimawh takzet a, Pep-a hote hian Liverpool point khatin an pha lo a, Arsenal aiin point khat chauhin an sang zawk. Ten Hag-a hote hian Etihad Stadium an luhchhuah chuan City hi table-ah pathumnaah an awm daih thei a, a tawi zawng chuan nomawi chawi lo thei dinhmunah an ding dawn.
Tun season-ah City hi rinkai zawk an nih ṭumah an chak lo fo a, chetsual an ngah vanga champion lo thei dinhmuna ding an ni. Man United lakah pawh rinkai chu ni mah se chesual thei tho an ni a, Liverpool leh Arsenal ten pressure an pek nat ve bawk avangin Pep-a hote tan derby match hi fiahna ṭha tak a ni ang.