Kawnpuiin Ramhlun SC an sawp

Mahindra XUV 300 LPS Cup Inter Village Football Tournament 2024 round of 32 chu khelh chhunzawm zel a ni a, nimin khan 1st Bn. MAP Ground, Armed Vengah inkhel pathum awmin, Kulikawn, Salem Veng leh Kawnpui Jt. ten an khingpui ṭheuh hnehin round of 16 an lut.

Nimin inkhel ngaihven hlawhah Kawnpui Jt chuan 4-1 in Ramhlun Sports Complex an sawp a, Lalkrossmawia'n hattrick siamin, Aizawl FC forward lar ṭhin Albert Zohmingmawia chuan goal khat a thawh bawk - RSC tan Lalmalsawmdawnga chuan khung ve mah se, scoreline cheimawina bak a tling lo.

Chawnpuiin Kulikawn lakah David Laltlansanga leh Ricky Lalnuntluanga hmangin vawi hnih ngawt hma an hruai a, mahse, Kulikawn hian Paulalmuan leh Vanlalhriatrenga hmanga chhangletin, 2-2 in inkhel a tawp a, a tawpah penalty hmangin Kulikawn hi 5-3 in an chak.

Salem Vengin Hualngohmun lakah harsatna an tawk lo, 6-1 ngawtin an sawp. C. Ramnunpuia chuan Salem Veng tan hattrick a siam a, Lalnunzira, David Lalchuuanawma leh Vanlalngheta ten goal khat ṭheuh an khung bawk - Hualngohmun tana Johny Lalremruata goal khungin awmzia a nei phak lo.