MSL9 - a thiam pali a hriat kim ta: Zarkawt BCA hmaah Champhai District BA

Mizoram Super League season 9 semifinal khel tur a hriat kim a, zanin dar 8:00 aṭangin R. Dengṭhuama Indoor Stadium, Mualpuiah semifinal hi khelh chhunzawm leh nghal a ni ang.

Vawi li champion tawh Zarkawt BCA chuan Champhai District Basketball Association an hmachhawn dawn - season hmasa finalist BCA hi rinkai zawk an ni mai thei, mahse Champhai hi zuamsual theih tur tak an ni ve bawk.

Zarkawr BCA hian league match vawi sarih an khelhah hnehna an chang vek, semifinal kalkawngah hian Champhai ngei pawh hi an lo hneh tawh tihna a ni a, inrintawkna sang tak nen an inlan thei ang.

Lalrina Renthlei, Matthew Remtluanga Sailo, Lalnuanpuia Renthlei leh H. Lalhmachhuana te bakah Zonunsanga te an a kawl khawm a, tualchhung player an neih ṭhatte hi thlamuanpui tham an tling a ni.

Champhai pawh dah hniam an remchang lo - season hmasa khan inlan ve mah se beisei an phak lo a, kuminah erawh a tikimtu an ni satliah tawh lo, team pariat zingah palina an ni phak.

Champhai hian Lalropuia, Lalfakmawia, Lalsangliana leh Zosangzuala ten an nei a, anni hi chakpui tham an ni. Anni ho tha tichak a, team khai ding turin Tevis Ryan Robinson Jr an la nei bawk - BCA tan fimkhur a ngai dawn.

Champion lai Khatla TBL chuan Nilaini zan khan an league match an lo khel zo tawh. TBL hi vawi hnih an chak lo a, table-ah pathumna niin an chunga awm Bungkawn LB Associates nen semifinal-ah an intawng ve thung dawn a ni.