Tennis player pahnih khung hrang

US Open khel tura inbuatsaih zinga mi Guido Pella leh Hugo Dellien chu an physio-in Covid-19 a kai tih hriat chhuah a ni a, player pahnih hian hripui kai ve rih lo mah se khung hran nghal an ni.

New York khawpuiah tennis kaihhnawih mi 1,400 an endik a, an zingah hian physio Juan Galvan pawh telin hri hi a kai. Ani hi world number 35 Pella leh number 94 Dellien te nena thawk dun a nih avangin a player-te hi midang zinga awm a rem ve rih lo.

Player pahnih hi tun kar tawp aṭanga khelh tur Cincinnati Masters-ah chuan an inlan thei dawn lo tih a chiang tawh. August 31 aṭanga khelh tur US Open atan erawh beisei an la nei, hri an kai lo a nih chuan khelh theihna kawng a la inhawng.

United States Tennis Association's (USTA) chuan Cincinnati Masters leh US Open te hi a hmuna entu awm loin Flushing Meadows, New York-a khelh turin an ruahman; hripui hluar lai a nih avangin player ṭhenkhat chu an inhnukdawk tawh.