Theihtawp chhuah zel a ṭul - Gakpo

Liverpool-in League Cup nomawi an chawi a, FA Cup quarterfinal lut turin Southampton chu 3-0 in an hneh zui bawk - player inhliam engemaw zat an nei chunga an result avangin fak an hlawh a, forward Cody Gakpo chuan chawl thei an la nih loh thu a sawi.

Dutch forward chuan, "Kar duhawm tak a ni a, duhawm taka season khar kan tumna kawnga bul ṭan dan lawmawm a ni. Hetiang level-a khelh hi chuan match tam thei ang ber khelh zel kan duh a, hliam vangin team-in harsatna tawk bawk mah ila, tunah rih chuan kan la tiṭha viau zelin ka hria.

"Tunah chuan thil dang ngaihtuah hman kan ni lo a, chauh leh buai sawi hman kan ni lo. Theihtawp kan chhuah zel a, point hlawhchhuah zel a ṭul ber. Kartawpah Nottingham Forest kan hmachhawn leh dawn a, a harsa dawn tih ka hria. Tunah hlimin phur viau rih mah ila, kan inkhel tur chauh kan ngaihtuah.

"A chhan chu team anga kan theihna leh thiamna kan hrechiang a, kan theihna zawng zawngin Nottingham pawh kan hmachhawn ang," a ti - Premier League hmahruaitu Reds hian zanin dar 8:30-ah Forest hi an lenchilh dawn.

Liverpool hian tun dinhmunah hliam an ngah hle. League Cup final-ah Wataru Endo leh Ryan Gravenberch an inhliam ve leh a, Andy Robertson a damloh bawk avangin senior player 14 ngawt chhawr theih loh an nei mek!

Reds player inhliam zingah March international break zawh lama lo kir tur an awm nual a, Dominik Szoboszlai, Mohamed Salah leh Darwin Nunez te chu lo kir hnai an ni a, he thu buatsaih a nih lai hian zanina an inlan theih dawn leh dawn loh erawh sawi theih a la ni lo.

Chuti a nih chuan Luis Diaz leh tun season-a goal 11 leh assist vawi nga nei tawh Cody Gakpo te chu Nottingham bul ṭan leh tur chiang an niin a rinawm a, Saints laka goal khungtu, kum 18 mi Lewis Koumas leh Jayden Danns te pawhin khelmuala hun hman leh an beisei ang.