F1 season an ṭan dawn ta

Formula 1 season thar chu zanin dar 8:30 aṭang hian tlan ṭan a ni dawn. Intlansiak hmasa ber atan Bahrain Grand Prix chu Sakhir Circuit-ah an tlan ang.

Car intlansiakna sang bera inelna hmasa pahnih hi Bahrain leh Saudi Arabia-ah tlan a ni dawn - Muslim sakhaw zui tute thla thianghlim an Ramadan lai a ni a, Pathianniah ni loin Inrinni zanah inelna hi neih a ni dawn.

Kuminah hian intlansiak 24 awm tura ruahman a ni a, inelna a tam ber ṭum season a ni dawn. Driver leh team ṭhenkhatten intlansiak a tam an tih thu sawi ṭhin mah se kalphung hi tihdanglam a ni dawn rih lo.

Season hmasa khan Max Verstappen chuan vawi 19 ngawt hnehna chang chungin champion nomawi a chawi a, kuminah pawh Red Bull driver bawk hi rinkai a ni leh dawn a, a bul ṭan ṭhat ngei a tum ang.

Red Bull driver pakhat zawk Sergio Perez pawhin season hmasa khan vawi hnih hnehna a chang thei, champion turin theihna a nei ve tho tihna a ni a, a hun ṭha hman ṭangkai ngei a tum dawn a ni.

Lewis Hamilton-a'n a team Mercedes tana a season hnuhnung ber a hmang dawn, season tharah chuan world champion vawi sarih ni tawh hian Ferrari a zawm dawn - hun rei tak a chamchilh tawh Mercedes tan ṭha taka hun hnuhnung hman a tum ang.