Chelsea-in Poch thlak tur melh ṭan

Tun season-a beisei phak lo, Chelsea manager Mauricio Pochettino chuan club neitute nen an inkar boruak a ṭhat thu sawi mah se, English journalist leh Chelsea hrechiangtu Simon Phillips chuan Blues hian manager dang an melh ṭan niin a sawi.

Phillips-a sawi dan chuan London club hian tun hnaiah Newcastle United manager Eddie Howe an thlithlai a, English coach hi Premier League hrechiang sa a nih avangin an duh hle niin a sawi.

Mahse, Phillips chuan,"Howe hian club thuneitu lam rilru a luah viau a, chutihrual chuan an thlithlai mek chauh a ni a, engmah hmalakna tak tak a la awm lo," a ti.

Howe hma hian Sporting Lisbon coach Ruben Amorim hming pawh lam rik a lo ni tawh a, kum 39 mi coach hian Sporting Lisbon enkawl mekin, 2020-21 season khan Primeira Liga leh Taca da Liga-ah champion nomawi a chawipui.

Kum 39 mi coach hi Liverpool nen pawh sawizawm a ni a, season kal mekah Sporting Lisbon chu league match 22 khelh tawhah pahnihna a nihpui mek a, hmahruaitu Benfica chu point hnihin an phak lo mek - match khatin an khel tlem thung.

Chelsea hian tun hnaiah coach an thlak lo a nih pawhin, season tharah chuan thlak ngei an duh niin an sawi. League Cup final-a Liverpool ngam lotu Chelsea hian FA Cup-ah quarterfinal lut zui mah se, Premier League table-ah 11-na an ni mek bawk a, club thuneituten Poch chunga rinna nghah reng an harsat.

Chutihrual chuan Howe hi tun season-ah a che ṭha bik lo tih hriat a ṭha a, Premier League match 26 an khelh tawhah 10-na an ni mek. An hnuai chiaha awm Blues aia an sanna hi point hnih chauh a ni a, match khatin an khel tam bawk.

Chelsea hian zanin dar 8:30-ah Premier League match an khel dawn a, khualmualah Brentford an lenchilh ang.