Copa del Rey: Atletico ngamtu Bilbao-in harsa loin final an lut
Spanish football-a club inelna ngaihhlut hlawh Copa del Rey-ah Spanish club lian pathum Real Madrid, Barcelona leh Atletico Madrid an champion dawn lo tih a chiang tawh.
Club langsar pathum zinga semifinal lut awmchhun Atletico Madrid chuan Ningani zan khan semifinal second leg-ah 3-0 ngawtin Athletic Bilbao an ngam lo a, first leg-ah 1-0 a an lo tlawm tawh bawk avangin an tla chiang hle.
Bilbao tan hian Inaki Williams, Nico Williams leh Gorka Guruzeta te chuan goal khat ṭheuh an khung a, khualmuala khel Atletico Madrid-in a chhanletna tur an neih loh avangin mualpho takin Spanish Cup chu an mangṭha.
Nilaini zan khan Copa del Rey semifinal lehlamah Real Sociedad leh Real Mallorca chu 1-1 in an inhnehtawk a, inkhel hmasaah 0-0 an lo inhnehtawk tawh avangin penalty hmanga chinfel a ni a, Mallorca hi 5-4 in an chak - April 6-ah final an khel ang.
Atletico an zawr
Player hming aṭanga teh chuan Atletico Madrid an lian zawk a, ke rek hliam vangin forward Antoine Griezmann chhawr thei lo mah se, tlarhmaah Alvaro Morata leh Angel Correa an la inkawp thei a, bench-ah Memphis Depay a la awm cheu.
Hei vang hian first leg-ah 1-0 a an tlawm chungin Atletico-in rin an la hlawh zawk a, mahse, beisei ang vek erawh a ni bik lo. Minute 13-naah Bilbao hian goal an khung nghal a, Nico Williams chuan a unaupa Inaki tan siamsakin, goal-ah a chantir.
Atletico an insiamṭha lo - minute 42-naah an goal hnihna an chhuah leh a, hei pawh Williams unau thawhchhuah tho a ni. Inaki chuan a goal hmahruai khung siamsaktu, a unaupa Nico tan a siamsak ve leh a, Nico hian an goal hnihna a khung.
Bilbao-in 2-0 in chawlhlawk an hmang a, inkhel hmasa nen belhkhawmin, 3-0 a ni tawh a, Atletico tan beisei a bo ṭan. Minute 61-naah Bilbao bawkin goal an khung leh a, Gorka Guruzeta chuan an goal lina a khung. Bilbao an chak a, 4-0 in an tlang.
Williams unau
Atletico lakah Williams unau an hrang a, goal an khung ve ve bakah, an goal khung tur an insiamsak ve ve - Bilbao tan chuan anni unau an nei thei hi thil lawmawm a ni. Williams unaua a naupang zawk Nico chuan, "Kan inman dan hi a ril bik riau a, kan inhrethiam tawn em em a ni," a ti.
Barcelona boss hlui Ernesto Valverde enkawl Bilbao hian quarterfinal-ah team ṭha Barca chu 4-2 in an lo pet chhuak tawh bawk a, he inkhelah pawh hian Williams unau hian goal an khung ve ve - tunah chuan final an luhpui ta.
Kum 21 mi Nico hian tun season inelna hrang hrangah match 27 khela goal ruk khungin, assist vawi 11 a nei a, Spain tan international football a khel. Kum 29 mi, a u zawk Inaki hian match 27-ah goal 11 khungin, assist vawi nga a nei a, ani hian a pianna Spain tana khel loin, Ghanaian a nihna angin Ghana tan a khel thung.
Nico chuan, "Ka hlim takzet a, final luh hi kan tan chuan mumang ram ang mai a ni a, a bik takin fans heti zozai hmaa final luh hi a nuam lehzual. Athletic hian final-ah hnehna kan chan theih ka beisei," a ti - inkhel hi a hmunah mi 52,061-in an en a, Athletic khelmuala inkhel en an tam ber ṭum a ni.
Copa del Rey
Semifinal - First Leg
February 6, Thawhlehni Zan
Real Mallorca 0 - 0 Real Sociedad
Februay 7, Nilaini Zan
Atletico Madrid 0 - 1 Athletic Bilbao
ATH: Álex Berenguer 25'
Semifinal - Second Leg
February 27, Thawhlehni Zan
Real Sociedad 1 - 1 Real Mallorca
RES: Mikel Oyarzabal 71'
REM: Giovanni González 50'
*Penalty-ah 5-4 in Mallorca an chak
February 29, Ningani Zan
Athletic Bilbao 3 - 0 Atletico Madrid
*Agg-ah 4-0 in Bilbao an chak
Final
April 06, Inrinni
Athletic Bilbao vs Real Mallorca