La Liga hotupain Greenwood chelh a duh

Spanish football-a league sang ber La Liga president Javier Tebas chuan Getafe tana khel mek, Manchester United aṭanga loan-a an hawh Mason Greenwood chu La Liga-ah a cham zel a beisei thu a sawi.

Greenwood hi a bialnu nena a thubuai chungchangah thiam chang tawh mah se, United hian Getafe lamah loan-in an kaltir a, a tirah English striker hi an club tana khelhtir tur angin lang mah se, transfer tawp niah loan-in an chhuahtir a ni.

Hetihlai hian United chuan Greenwood hi an club tana khel turin an duh tawh lo ang hiala ngaih theihin thu awmze nei an sawi a, mahse, tun hnaiah khan United-a share nei thar Sir Jim Ratcliffe chuan Greenwood dinhmun chu zirchian thar ṭul a tih thu a sawi.

Tebas chuan, "Dan hremi ka ni a, a thubuaiah miin thiam a chang a nih chuan enge sawi belh tur awm chuang? Player a nihna angin season duhawm tak a hmang a, Spanish football-ah a cham chhunzawm zel ka beisei - chu chu kan tan a ṭha a ni.

"Dan thutlukna chu kan zah tur a ni a, media hmaah Greenwood hi an sawisel a ni mai thei a, mahse, danin thutlukna a siam tawh. Engmah sawi belh tur a awm lo. Thiam a chang miau a, a chungchang sawi theih ka nei lo," a ti.

Kum 22 mi Greenwood hian Getafe tan inelna hrang hrangah match 25 khelin goal sarih a khung a, assist vawi nga a nei. Getafe hi league table-ah 10-na a nihpui mek a, zanin dar 11:00 hian Las Palmas an mikhual dawn.

Hmahruaitu Real Madrid chu zanin dar 1:30 hian an inlan dawn a, Valencia an lenchilh ang. Copa del Rey semifinal-a tla hlim Atletico Madrid chuan Pathianni zan dar 8:45-ah Real Betis an mikhual dawn a, Barcelona-in Pathianni zan dar 1:30-ah Athletic Bilbao an lenchilh thung ang.