Alonso-a'n khaw dang a hawi rih lo

Xabi Alonso-a'n Bayer Leverkusen tan thil mak a timek a, European club lian ṭhenkhat chuan an hnena kal turin an duh. Liverpool nen sawizawm a ni a, nipui bazar tingaihnawmtu a ni dawn.

Liverpool manager Jurgen Klopp-a'n tun season tawp rualin Anfield a chhuahsan tur thu a tichiang tawh a, amah thlak tur an zawng mek. Reds chuan player a nih laia an kawl tawh Alonso hi an la hreh loin a rinawm.

A hma hun zawhna chhangin Alonso chuan, "Tunah chuan Bayer Leverkusen coach ka ni a, thil dang engmah a awm rih lo. Ka hma hun chungchangah erawh sawi lawk theih engmah ka nei lo," tiin a sawi.

Alonso-a'n a cham dawn nge a chhuak dawn tih a sawi chiang lo. Hetih lai hian Leverkusen sporting director Simon Rolfes chuan an coach ṭha hi season tharah pawh an hnenah a cham chhunzawm ngei a rin thu a sawi ve thung.

Spanish manager Alonso kaihhruai Leverkusen hian Bundesliga-ah hma an hruai mek - champion lai Bayern Munich lak aṭangin nomawi chhuhsak thei dinhmunah an ding mek. Pathianni zan dar 8:00 hian Cologne an lenchilh dawn a ni.