Napoli mualah Juventus

Pathianni zan dar 1:15 hian Napoli chuan Juventus an lo mikhual dawn - Massimiliano Allegri enkawl Juve hi an chak lo a nih ngat chuan an chunga awm Inter Milan chu champion tura puan ngam an ni tawh ang.

Champion lai Napoli hian kar laihawl khan Sassuolo chu 6-1 in an sawp a, he inkhelah hian an striker chhuanvawr Victor Osimhen chuan goal thum a khung - Nigeria international hi Old Lady tlarhnung tan pawha ven uluk ngai tur bik a ni.

Napoli boruak a ṭha leh tawh a, coach thar Francesco Calzona kaihhruaina hnuaiah an indinthar mek, champion nomawi humhim beisei ngam tawh chiah lo mah se Champions League tal khelh an duh dawn, thapui an thawh leh ngei ang.

Juve manager Allegri-a'n hliam vangin Adrien Rabiot leh Weston McKennie te a la chhawr thei dawn lo a, an ṭhat dan berin an la khel thei dawn lo tihna a ni a, chutihrualin an neih mekte pawh an la ṭha tawk hle.

Turin club hian Serie A match 26 aṭangin point 57 an hmu tawh a, hmahruaitu Inter Milan an phak lohna chu point 12 a ni mek - Napoli an hneh a nih chuan Inter nen an inkar hi a sawr zim lailawk thei dawn tihna a ni.