Tuikual South-in an BYE BYE ta e A tawpah Mission Veng Vikings an zuih ral
Mission Veng Vikings ṭantu an ṭhathnem em avangin Hawla Indoor Stadium a lang te vek a, an bye bye hun nghaka an ṭhut ṭhup laiin KC Lalliantluanga hoten tum dang neiin thawnthu tawp dan an thlak nalh hle. Tuikual South mipuiin Mission Veng ṭantute bye bye nawnin final an thleng ta.
Ningani zan khan Tuikual South-in MSL2 semifinal game 3-ah Mission Veng Vikings chu 76-69 in an hneh a, final-ah champion lai Khatla TBL an hmachhawn ang. MSL2 final game 1 hi April 15, Zirtawpni Zanah khelh a ni dawn.
Dishant an chelh
Mission Veng-in Dishant V Shah tel loin bul an ṭan a, 10-0 zetin Tuikual South lakah Vikings an fal nghal. Minute li leh second 28-ah Dishant a rawn lut a, coach KC-a game plan a lang nghal. Gujarat center hi lian ṭha mah se Tuikual South lamin an double team zel a, Mission Veng lam 'Le Le Le' tia an au pawhin Phengphehlep lam an zam phah lo.
Vikings-in game 2-a an chhuan ber Lalrina leh Dishant inkawp chu TKS-in an chhu chat a, kar khat chhungin KC-a leh a hoten 'homework' an thawk ṭha hle. Amaherawhchu Moses Zoremmawia leh Van-nunpuia Varte chet ṭhat zarah Vikings an chungnung a, chutihrualin team pahnihin Dishant ringawt an ngaihtuah avangin Mission Veng-in khel ṭha lo zawkah an inngai a, Tuikual South lam khel chhiaah an inngai tlat lo.
Game Plan
Vikings game plan A a thawk fuh tawk lo a, coach Reu-ben Lalchhandama'n quarter thumnaah Dishant a la chhuak a (a lungawi lo!), hetihlai hian point dinhmun chu 46-40 a ni.
Court chhunga player manto ber leh sang ber a chhuak a, Lalrina chetfuh zan a ni lo a, defence leh offence-a pawimawh Kima Sailo a inhliam zui avangin Tuikual South chu team chhe zawk an ni tawh lo, Vikings game plan B a hlawhchham!
Tuikual South plan erawh a la ngai reng a, player an inthlak kual reng a, free throw luh theih loh zanah foul an hreh lo. Court chhungah F. Zodinthara'n captain ṭha a ni tih a lantir fo a, Vanchuangpuia awm lo mah se MS Dawngzela'n mawhphurhna chu a phak ang tawkin a hlen ve zel. Third quarter-ah Eddie Zothanpuia'n en bik a hlawh a, Lunglei Ramthar guard hian buzzer beat-in three points a lut a, 57-57 a ni.
A ruh no hriat hun
An inhnehtawk reng laiin Mission Veng lamin chak loah an inngai tawh a, team an au phur tawk lo. Tuikual South player-te leh ṭantute erawh an phur tulh tulh a, Eddie hmanga hma an hruai nawn hnuah an hawi kir lo.
Vikings lamin Dishant luhtir bawk mah se teamwork a awm lo a, an player ṭha ber Gujarat center in ball a hmu thei lo. Mission Veng player-te'n mahni ṭheuha luh an tum a, Dishant-a meuh pawhin 3 point luh a tum takah chuan an talbuai takzet tih a lang. Tuikual South player-ten freethrow hlah mawlh mawlh mah se harsatna nei loin hnehna an chang.
Freethrow?
Basket neih dan awlsam anga ngaih freethrow kha mipui an tam meuh chuan luh a harsa a ni chek ang chu Vikings lamin vawi 44-ah vawi 18 chiah an lut a, Tuikual South-in an la lut chhe zawk, vawi 43-ah vawi 8 chiah an lut - Mizo player-te'n NBA vela move ropui tak tak entawn loin awlsam taka free throw luh an zir a la ngai takzet.
Tuikual South coach KC-a chuan, "Basketball-ah chuan freethrow hi danglamna siamtu a ni ṭhin a, khati khawpa kan lut thei lo chunga kan chak kha chu a mak a ni. Rakesh kan chah thleng thei lo a, kan innghahna ChP-a kan chhawr thei lo a, sawi tur dang a awm lo. Kan chak chhan chu Pathian vang chauh a ni," tiin Vanglaini palai a hrilh.
Rinkai loh zawk ni mah se Tuikual South-in chak an inbeisei a, coach awm loh vanga team enkawltu Lalngengpuia leh supporter-te an fakawm. Mission Veng lamin chak loh an thiam a, Tuikual South chak an lawmpui thiam kha hmuh a nuam bawk.
Zan fuh lo
Mission Veng Vikings coach Lalchhandama chuan, "Dishant kan lakchhuah chhan kha a foul out kan hlauh vang a ni a, kan team khan an khel thei lo a ni. Inkhelh hmain team tan kan khel tur a ni tih vawi tam ka sawi a, an zawm tlat lo. Dishant kha hun harsaah pawh ball pek kan tum tur a nih laiin mahni
ṭheuha tih kan tum a, kan chak loh phah a ni," tiin game plan anga an khelh loh thu a sawi.
An vanduai zan tih sawi zuiin ChD-a chuan, "Mipuiin theihtawp an chhuah a, player-te pawhin theihtawp an chhuah bawk. Game plan lam chu eng pawh ni se kan tifuh tawk lo a nih pawhin vannei ilang chuan chak thei kan ni a, kan tan zan fuh lo a ni," a ti.
Hmabak TBL
Vanglaini palaiin 'Khatla TBL-in ngam si loa engtin nge ni dawn?' tia a zawhin Tuikual South coach KC-a chuan, "Engtin nge chutiang ngaihdan in neih theih? Keini hi Khatla TBL ngam ber kan ni a sin," tiin champion lai hmachhawn dawn mah se a zam lo.
Tuikual South hian MSL-ah TBL an la hneh ngai lo a, kuminah Mapuia Zote leh K. Vanlalruata te hmangin team an chak sawt a, final-ah fiahna an hmachhawn ang.