Tennis ka chawlhsan hman ṭep - Del Potro

US Open champion pawh lo ni tawh Juan Martin del Potro chuan a banrek na vanga harsatna a tawh nasat avangin tennis khelh a chawlhsan hman ṭep thu leh tunah chuan beiseina thar a neih leh tawh thu a sawi.

Kum 27-a upa Del Potro hi a ban rek vawi thum ngawt zai a ni tawh a, thla 11 dawn a inkhelh theih loh hnuah February thla khan Tennis Court-ah a hmel kan hmu leh
ṭan a, a hliam dam hnuah champion nomawi la chawi leh chiah lo mah se ṭha takin a inkhel leh thei tawh.

Argentina tlangval chuan, "Tennis khelh ka chawlhsan hman ṭep a ni. Ka hliam vangin inah ka awm a, TV aṭangin tennis en pawh ka duh ngai lo, a chhan chu ka rilru a tih hreawm ṭhin vang a ni. Ka banrek vawi thum zai a nih hnuah tunah chuan hmalam ka pan ve leh tawh a, beiseina nen ṭha takin ka inkhelh leh thei tawh a ni," tiin a sawi.

Kum 2009 US Open-ah khan Del Potro hian semifinal-ah Rafael Nadal hnehin final-ah Roger Federer a hneh zui leh bawk a, khawvela tennis player ropui bera ngaih pahnih te major tournament-a hneh kawp thei awmchhun a la ni nghe nghe a ni.