Dortmund-ah Real Madrid rawlthar

Borussia Dortmund chuan Spanish champion Real Madrid aṭangin Brazil Under-23 forward Reinier an lalut a, season hnih chhung loan hmanga khel turin inremna an siam.

Kum 18 mi Reinier hian January thla khan Flamengo aṭangin Real hi a zawm, La Liga champion tan hian senior team-ah a la khel lo. Season tharah pawh hmun a chan phak dawn loh avangin khelhna hmun hmuh beiseiin Dortmund hi a pan.

Reinier chuan, "Borussia Dortmund hi player naupangte tana hmun ṭha a ni tih ka hria, he hmunah hian mi tam takin hmasawnna an lo char tawh, kei pawhin chutiang hmuh beiseiin ka pan," tiin Bundesliga club a thlan chhan a sawi.

Dortmund sporting director Michael Zorc chuan, "Reinier hian theihna sang tak a nei, hmabak eng tak a neih bakah tunah pawh chhawr theih turin a inpeih," a ti. Reinier tan khelhna hmun chang tur erawh chuan a thawhrim a ngai ang.

Season hmasa khan Dortmund hi Bundesliga-ah pahnihna an ni a, tunah hian season thar atan inbuatsaihna an nei mek. Pathianni khan Austria Vienna chu friendly match khelh puiin 11-2 in hnehna an chang, goal khungtu zingah Manchester United hellai Jadon Sancho pawh a tel.