Aizawl FC-in Rs 70,000 chawi dawn

Rajiv Gandhi Stadium-a Aizawl FC leh Kingfisher East Bengal inkhelh ṭuma mipui chet mawi loh avangin I League thuneitute chuan Mizo club chu Rs 70,000 chawi turin an hrem.

March 12 khan Aizawl FC-in Yuta Kinowaki leh Brandon VL Remdika hmanga East Bengal laka hma an hruai hnuah Kolkata club-in Ranti Martins hattrick hmangin hnehna an chang. Inkhel entuten Aizawl FC defender Emma Chigozie leh Lalramchullova hnawhchhuah a nih bawk avangin referee chungah an lungawi lo a, inkhelh banah tui bottle nasa takin an vawm lut a, Mizo mipui chet dan hi dan kalh an nih avangin Rs 20,000 chawitir an ni.

Inkhelh lai vek hian inkhel entu zinga pakhat chuan a player ngaihsan technical area-a awm S. Malsawmtluanga chu a zuk kuah a, dan kalh a nih tlat avangin Aizawl FC-in Rs 50,000 an chawi a ngaih phah ang.

I League thuneitute chuan Aizawl FC chu hmalam hun atana fimkhur turin an chah a, an tisual nawn a nih chuan hremna chu a leta a pun tur thu an hriattir bawk.