Marcelo hi lemchan thiam a ni - Wolfsburg boss

Wolfsburg manager Dieter Hecking chuan Champions League quar-terfinal first leg-a Real Madrid an hneh ṭuma tlu der Marcelo chu lemchan thiam tak a nih thu a sawi.

Nilaini zan khan Wolfsburg hian 2-0 in an mikhual Real Madrid hi an hneh a, Marcelo hi a ball chhar hawi chhuak chuan a hnunga ding Wolfsburg midfielder Max Arnold awm tawk fuhin hliampui tuar ang maiin a tlu a, Arnold hian yellow card a hmuh phah a ni.

Dieter Hecking chuan he thil thleng duhawm lo tak chungchang hi sawiin, "Marcelo hi lemchan thiam a ni. A chet dan kha thil
ṭul lo tak a nih avangin ka thinrim em em a ni," a ti.

England manager Glenn Hoddle pawhin Marcelo chet dan chu zahpuiawm a tih thu a sawi a, Manchester United midfielder hlui leh TV pundit ni ta Roy Keane chuan Marcelo chet dan chuan a barakhaih takzet thu a sawi bawk.

Hetihlai hian Marcelo chet dan mawi lo tak avanga yellow card chawi Arnold erawh a ṭawng tam duh lo a, "Marcelo anga sam mawi tak neih ve hi ka chak a ni," ti chiahin a ṭawng chhuak.

Brazilian midfielder chet dan hi match referee-in a hmuh hmaih avangin UEFA chuan Marcelo chungah hian hremna an lekkawh dawn lo.