Arsenal hmachhawn tur Bilic a zam lo

Vawiin tlai dar 5:15 hian Arse-nal chuan West Ham nena Premier League khel turin Upton Park an pan dawn a, mikhual thleng tur Hammers manager Slaven Bilic a zam lo.

Tun season a an league match hmasa berah West Ham hian Arsenal chu Emirates Stadium-ah 2-0 in an lo va hneh tawh a, tun dinhmunah league-a palina Manchester City chu point liin an thlau mek a, Manchester United aiin point hnihin an hniam rih bawk. Season thara Champions League khelh tum tan point hloh a thiang tawh loa ngaih a ni.

Arsenal hian 2003-04 hnua a vawi khat nan league title beisei ve mek mah se Leicester City leh Tottenham an phak lo mek a, Arsene Wenger naute tan chetsual a thiang tawh bik lo.

Kum 47-a upa Bilic chuan, "Mipui beisei aiin kan thleng sang tawh niin a lang. Kan match hmasa bera Arsenal kan hneh kha kan vanneih vanga ngaih ni mah se season tluana kan inkhelh dan thlir erawh chuan tifuh satliah kan ni lo. Kan hmabakah hian tihsual nei lo thei ang berin a sang pali zinga tel kan tum ang," tiin a sawi.

Bilic chuan London derby chung-chang sawi chhunzawmin, "Inkhel hautak tak a ni dawn a, cham-pion tum leh a sang pali zinga tel tum kan nih avangin a pawimawh hle. Arsenal hneh tur chuan minute 90 chhung
ṭha taka khelh a ngai a, ball kan hloh a nih chuan an tana hmunawl awm lo tura kan insiamrem nghal zung zung a ngai ṭhin," tiin Gunners hneh tur chuan fimkhur a ṭul thu a sawi.

Croatia manager hian a defender pahnih James Collins leh Sam Byram te chuan nimin aṭang khan team training an zawm tur thu a sawi a, mahse kartawpa inkhelh chu an tan a la hma deuh theih thu a sawi bawk.

Arsenal tan Mathieu Flamini leh Aaron Ramsey an inkhel thei tawh tura ngaih a ni a, Thomas Rosicky leh Jack Wilshere te hliam dam tawh mah se an inlan a rinawm loh thung. Santi Cazorla leh Alex Oxlade-Chamberlain te chuan training pawh an la zawm lo a ni.