Europa League Klopp-a kir zanah Reds leh Dortmund inhnehtawk

Borussia Dortmund a chhuah-san hnua a vawi khat nan a ropuina ramah Liverpool manager Jurgen Klopp-a kir a, Signal Iduna Park-ah a naute hnehna chanpui zo lo mah se khualmualah goal khat hlu tak an khung.

Ningani zan khan Borussia Dortmund leh Liverpool-te'n Europa League quarterfinal first leg an khel a, team pahnih hi goal khat ve ve khungin an inhnehtawk. Anfield-ah second leg an khelh leh dawn avangin khualmuala goal khungtu Liverpool dinhmun a duhawm rih zawk.

Inkhel ṭan aṭanga minute 36-naah Divock Origi-a'n Reds tan goal hmahruai khung mah se Dortmund goalkeeper Roman Weidenfeller chet ṭhat zanah Mats Hummels-a'n mualneitu team tan minute 48-naah an si phurh sutna goal a khung a, 1-1 in team pahnih hi an inhnehtawk ta a ni.

Klopp a chesual lo

Reds manager Jurgen Klopp-a'n tlarhmaa duhthlan tur a neih aṭangin England international Daniel Sturridge aiah Belgian rawlthar Origi-a thlang a, mi tam tak mak tih a hlawh.

Origi hian Ferbruary 14 hnu-ah goal a khung leh tawh lo a, hliam vanga a buai reng hnuah Sturridge-a'n ngai la awh chiah lo mah se match kuaah goal thum a khung leh tawh a, player pahnih thiamna leh theihna enin Stur-ridge hi thlan awm zawk chu a ni.

Mahse, inkhel ṭan tir lamah Origi hmel hmuh tur awm lo mah se Klopp-a'n player tlanchak leh tharum ngah tia a sawi striker hian a manager thusawi dikzia nemnghet turin goal a khung a, captain Jordan Henderson-a ball pek a khung dawnin a tharum leh tlan chakna a hmang thiam hle.

Kum 20-a upa striker hian goal a khung hnuah Dortmund tlarhnung vawi tam a chhaih buai a, goalkeeper Roman Wei-denfeller nen chauh an inhma^-chhawn hnua a goal khung loh erawh a ui khawp ang.

Dortmund-in Europe-a striker hlauhawm ber pawl Pierre-Emerick Aubameyang kawl mah se Reds tlarhnunga Dejan Lovren leh Mamadou Sakho-te inkawpin Gabonese striker an dang hneh hle.

Tun season-a goal 33 khung tawh striker hi chance nei lo tawp erawh a ni bik lo, hnai taka a pet chu Lovren-a'n a lo dang hman a, Henrikh Mkhitaryan-a pet goal tawh ngei tur nia lang chu Sakho-a'n ṭha takin a lo dang bawk.

'El Kloppico' chu

Europa League quarterfinal-ah Dortmund leh Liverpool an inhmachhawn dawn tih a chian khan mipui mit fukna chu Dortmund-a league no-mawi vawi hnih lo chawi tawhtu Klopp a ni. Germany manager hming chawiin team pahnih inhmachhawn tur hi 'El Kloppico'-tia a hming vuah a ni nghe nghe.

Inkhel ṭan hma press con-ference-a journalist pungkhawm ringawt pawh 100 chuang an ni a, television crew ringawt pawh 20 vel an awm - hei hian Dortmund khawpuia Klopp ropui zia a hrilchiang hle.

Signal Iduna Park-a inkhel ṭan a nih hmain hmun tinah Jurgen Klopp-a hming chuanna banner hmuh tur a awm a, inkhel ṭan hmain Dortmund fan-te Klopp-a hming lam chungin an au rual a, ropuina rama hlangkaitu an manager hi an theihnghilh lo.

Reds an him em?

Liverpool-in khualmualah goal khat khungin Dortmund an inhnehtawkpui a, Anfield-a inkhel leh tur an nih bawk avangin English club hian semifinal lut tura rin an hlawh tawh zawk ngei ang.

Hetihrual hian awlsam taka thai bo tur erawh chuan Dort-mund an ṭha mah mah - German club hian khualmuala an game hnuhnung parukah goal an khung vek a, last 16-a White Hart Lane-a goal hnih khungtu an ni tih hi Reds tan theihnghilh a thiang lo bawk.

Reds-in set piece bikah an defending an ngaihtuah ṭhat a ṭul viau bawk. Hummels-a'n an si phurh sutna goal corner aṭanga a tauh luhna kawngah Reds defender-te'n an tih tur an ti lo a, Dortmund captain hian ven lohin awlsam takin a tauh lut - Liverpool-in Europa League-a an goal chhuah hnuhnung pathum hi set-piece aṭanga lut vek a ni.

Thawnthu hlui keu let erawh chuan Liverpool din-hmun a ṭha zawk. Europe-a inelna khualmuala first leg-a an khingpui an inhnehtawkpui vawi 12-ah vawi 11 chu a tlang zawkah an ṭang.

Eng nge an sawi?

Borussia Dortmund mana-ger Thomas Tuchel chuan, "Zaninah khan chak kan phu lo a, Liverpool lakah hian game awlsam tak kan beisei lo sa hrim hrim bawk. Mahse, kha aia khel ṭha thei zawk erawh kan ni a, passing mumal leh awmze nei zawka khel thei tur kan ni," tiin tun aia ṭha zawka khel thei an nih thu a sawi.

Tuchel chuan Anfield-a in-khel tur thlir nghalin, "Khual-muala goal khung kan harsat loh miau avangin kan hlauthawng lo a, zaninah hian kan hnual hek lo. Chak tur chuan kan
ṭhat dan bera kan khelh chhuah a ngai a, kan ṭhat dan berin kan khel chhuak lo a ni mai. Hmun hrang hrangah inkhela kalin kan lo chak tawh ṭhin a, tunah hian half-time chauh a la ni. Ka player-te an inringtawk a, Anfield-a inkhelh kan chak tawh a ni," tiin a zam lo.

Liverpool manager Jurgen Klopp chuan, "Dortmund hi team ṭha tak an ni a, chu chu mi zawng zawngin an hria a ni. Mahse, zaninah erawh team ṭha zawk kan ni a, hnehna chang thei kan ni. Mi tam zawk chuan 2-0, 3-0 emaw 4-0 a chak lo turin min ring ngei ang. Mahse, Dortmund kha kan thuhnuaiah kan dah a, goal hmaah kan hlauhawm em em a ni," tiin a naute khelh danah a lawm hle.

Klopp chuan Reds aiin Dortmund chu team ṭha zawk an ni tih a pha lo a, "Dortmund anga team ṭha ni tur chuan kawng tam tak zawh tur kan la hmabak a, an khelh dan angin kan la khel ve ngawt thei lo. Mahse, kan goal ven dan kan hria a, goal khung kan thiam bawk avangin kan chak ang," tiin Anfield-ah pawh chak an tum thu a sawi lang.

German coach chuan amah lawmtu Dortmund fan-te hnenah lawmthu sawi nghalin, "Dortmund fan-te'n min zahna lantir nana kut an beng kha ka lawm takzet a ni. He hmuna mipuite hi ka tan chuan an hlu a, zanina ka kir leh hi ka hlim takzet a ni," tiin Dortmund chu a in a nih thu a sawi.

Hmabak

Pathianni zan dar 8:30-ah Liverpool-in league match an khel lehnghal dawn a, Anfield-ah Stoke City an mikhual dawn a ni.

Borussia Dortmund-in Pa-thianni zanah vek league match an khel dawn a, dar 7:00-ah Schalke chu khualmualah an lenchilh ang.

Inkhel dang

Ningani zan Europa Lea-gue-ah quarterfinal dang pawh khelh vek a ni a, Shaktar Donetsk chuan khualmualah 2-1 in Sporting Braga an hneh a, an dinhmun a ṭha hle.

Villarreal-in Cedric Bakam-bu goal hnih khung hmangin an mikhual Sparta Prague chu 2-1 in an hneh bawk.

Spanish club pahnih inhma-chhawnah champion lai Sevilla chuan 2-1 in Athletic Bilbao an hneh a, Bilbao tan Aritz Aduriz-a'n goal hmahruai khung mah se mikhual team Sevilla-in Timothee Kolodziejczak leh Vicente Iborra hmangin an chhang let.