League nomawi chawi turin Milan hneh a ṭul - Morata

Zanin dar 12:15 hian San Siro-ah Serie A inkhel pawimawh a awm dawn a, AC Milan chuan league hmahruaitu Juventus an lo mikhual ang.

Champion lai Juve hian season bul ṭan fuh tawk lo mah se an insiamṭhat hnuah an chesual tawh lo tluk a ni a, kum 2016 bikah league match 13 an khelh tawhah vawi khat chiah chak loh neiin goal 28 an khung a, goal khat chiah an chhuah nghe nghe. Napoli aiin point ruka an san zawk tawh avangin zanin hian hnehna an chang thei a nih chuan nomawi an ban phakah a awm tawh dawn.

Hetihlai hian Milan erawh beisei angin an la thochhuak lo tluang zel. An lo ropui fo tawhna Champions League-a inlan tur pawhin an hna a hautak tawh a, pathumna AS Roma chu point 14 zetin an phak lo mek a ni.

Juve striker Morata chuan, "Milan hi engtik lai mahin khelh an awlsam ngai lo, a bik takin San Siro-ah phei chuan an deh a khirh thei hle. Point an mamawh zual lai a nih bawk avangin kan fimkhur pawh a ṭul ang," tiin a sawi.

Spain international chuan league nomawi a pawimawh thu sawi chhunzawmin, "Tuna kan thil tum ber pakhat chu league nomawi chawi hi a ni. Roma hian min khalh deuh tawh avangin Napoli nen hian an inum na zual tawh a, ka ngaihdan chuan champion leh champion loh chu kan kutah a awm tawh. Hlawhtlinna chang tur chuan Milan lakah pawh hian hnehna chan a pawimawh," tiin a sawi.