United-in Foxes kawng sialsak dawn em?

Leicester City-in Premier League match ruk lek khelh tur la awmah point sarihin anmahni hnaih bertu Tottenham Hotspurs lakah hma an hruai a, Claudio Ranieri hoten Pathianni zan dar 6:00-ah tla thei dinhmuna ding Sunderland an tlawh dawn. Darkar hnih leh a chanve hnuah White Hart Lane-ah Spurs leh Manchester United an inhmachhawn dawn a, Foxes champion kawng sialsak theitu chu Louis van Gaal-a hote an ni.

Point 40...

Nikum nipui lai khan Leicester City chairman chuan, "Claudio, kan club tan season pawimawh tak a ni a. Premier League khelh zel hi kan tan a pawimawh a, kan him a
ṭul a ni," tiin manager Claudio Ranieri a hrilh. Italian manager chuan rim taka thawkin an beisei ang result hmuh pui ngei a tum a, him tura an mamawh zat chu point 40 nia ngaih a ni.

Kum 64-a upa Ranieri chuan, "Nikum tun ang hunah hian table mawngphahah Leices-ter an awm a, kumin April 4-a chanchinbu ka chhiar hunah Premier League hmahruaitu kan ni ang tih ka ngaihtuah pha ngai lo. Kan thlen chin hi a mak a ni," tiin hmahruaitu dinhmun an hauh mek chu mak a tih thu a sawi.

Tunah chuan Leicester hi hmahruaitu satliah an ni tawh lo a, champion tura rinkai an ni tawh. Foxes hian league match hnuhnung 10-ah match riat an chak a, match hnuhnung 14-ah vawi khat chiah an chak lo. Claudio Ranieri hote hi chesual thei an ni a, amaherawhchu an hnuaia awm club-te hi talbuai thei tho an nih avangin nomawi chawi turin Foxes dinhmun a
ṭha tawh a, Sunderland an hneh theih chuan a ṭha lehzual ang.

Match li chhung goal chhuah tawh lo Leicester keeper Kasper Schmeichel chuan, "Sunderland kan khelh zawha thil thleng tur kan ngaihtuah a nih chuan Pathianni zan inkhel turah kan rilru kan pe tawk lo ang. Chuvangin kan match hmabak zela kan khel tur chauh hi kan thlir a, pressure nei miah loa kan awm thei hi a nuam khawp mai," tiin chenna ngai lo hmunah awm mah se an buai loh thu a sawi.

Him duh Black Cats

Leicester City-in match hnu-hnung paliah Watford, Newcastle, Crystal Palace leh Southampton te 1-0 vekin an hneh a, tun ṭuma an hmachhawn tur Sunderland hi point hloh theihna a ni. Black Cats hian Premier League khel zel turin chak an mamawh a, anmahni aia match khata khel tam Norwich City point liin an pha lo.

Club pahnih hi an intawn hnu-hnun ber ṭumin Leicester 4-2 in an chak a, Stadium of Light-ah erawh goal awm loin an inhnehtawk thung. Sunderland manager Sam Allardyce chuan an squad chhah chu an ṭhatpui tur thu a sawi.

Big Sam chuan, "Tun hnai khan Ryan Giggs ka bia a, ani chuan kan bulah Fergie a rawn kal ang a, kar thum hnuah Manchester City hmachhawn turin inpeih rawh tiin min rawn hrilh ang. Khatia a rawn sawi kha chuan kan awl chhan kan hre ṭhin. Keini pawh hian player intluk tlang hman tur kan kawl hnem a, season tawp atan squad chhah hi a pawimawh a ni," tiin a sawi.

Inkhel pawimawh

Manchester United-in Cham-pions League an khel pha a nih chuan season tharah player ṭha an hip thei dawn a, mah se Tottenham Hotspurs in champion an tum avangin chak an mamawh ang. Season hawnna inkhelah vannei takin United-in Spurs hi 1-0 in an hneh.

United captain Wayne Rooney chu a la inlan thei dawn a, Everton an hneh ṭumin Daley Blind inhliam mah se Ashley Young leh Phil Jones te first team-ah an rawn let leh tawh hmel avangin tlarhnungah buaina a awm a rinawm loh. Dutch defender aiawh tur hian rawlthar Tim Fosu-Mensah a awm bawk.

Everton lama chakna goal khungtu Anthony Martial tun season-ah goal 13 a khung tawh. United player hlui Brian Kidd leh captain ni lai Wayne Rooney tenUnited tana an sea-son khatnaah goal 17 an khung a, rawlthar (teenager) ni chunga United tana season hmasa bera goal khung tam ber record siam thei dinhmunah a ding.

Spurs captain leh goalkeeper Hugo Lloris chuan, "Chak duhna rilru kan pu a, tun season chauh ni lo, season dang zel atan pawh a pawimawh a ni. Liverpool (1-1) lakah kan vanduai a, kan match lehah chuan kan vannei tawh ang," tiin United an hneh theih thu a sawi.