Espanyol khelmualah Atletico Madrid

Zanin dar 9:45-ah Atletico Madrid-in league match khel turin Espanyol khelmual an lenglut dawn a, Champions League-a Barcelona hneh loh zawh hlima kum 2009 hnua vawi khat chiah an la chakna khelmuala lenluh hi an chak lo ang.

Hetihlai hian Espanyol midfielder Victor Sanchez chuan Atletico Madrid chuan an player ṭha zawk an chhawr loh a beisei thu sawiin, "Atletico hi Champions League khel zo hlim an nih avangin an chau dawn a, kan khelmuala an lo zin hunah an player ṭhate an chawlhtir ngei ka beisei," tiin Atletico chuan squad pan zawk luhtir se a duh thu a sawi.

Sanchez chuan sawi chhunzawmin, "Atletico hian kan khelmuala an khelh ṭhat ngai loh avangin rilru chu tlem chuan a hahdam deuh a, zaninah an record duhawm lo hi lo din tir zel kan tum dawn a ni," tiin Atletico an hmachhawn hunah theihtawp an chhuah tur thu a sawi bawk.

Atletico hian hliam vangin centre-back pahnih Stefan Savic leh Jose Gimenez-te an la chhawr thei dawn lo a, French rawlthar duhawm Lucas Hernandez chu Atletico tlarhnungah Diego Godin nen inkawp leh tura beisei an ni.